「莫探員」黃子華在香港搞到大家如癡如醉後即轉戰大陸，到了橫店拍攝楊紹鴻監製的新劇《名嘴大狀芝麻官》，此劇又再開正子華「棟篤」專長；除了子華之外，還有「斗官」蘇永康及羅家英，劇中子華、康仔還要剃頭上陣，原來二人都是「處男剃頭」，昨日二人試造型時，可謂百般滋味在光頭。

男演員一向最怕剃頭會令頭髮不再生長，問到子華可有擔心，他笑笑說：「冇擔心過，因為都知道死梗，其實呢啲嘢有就有、冇就冇，不過我啲頭髮咁豐厚，（點解肯咁大犧牲？）係人都總要剃一次頭，啲名演員都要剃，發哥（周潤發）都剃過。（而家感覺如何？）好怪，涼浸浸摸落去好似摸到自己內臟、摸到啲腸咁，（咁靚唔靚呀？）OK喎，都幾靚喎。」至於為何子華不曾在香港剃頭演出，他笑言只因香港從來無人夠膽要他剃頭而已。

康仔預備防曬油
此外，康仔亦同樣是初嘗光頭滋味，他坦言感覺不錯：「我光頭都幾好睇呀，不過我都係自己剃一刀，其他由子華幫我剃，（老友張衛健咁多光頭經驗，有冇問佢攞啲養髮心得呀？）佢唔剃都唔會生㗎啦，邊有心得呀，不過我除咗剃頭前做心理準備之外，亦都問晒人哋嘅經驗，最緊要搽防曬油，之前我都喺冬天過嚟橫店拍劇，買定晒啲帽保暖，（你都肯剃頭拍呢個劇嘅？）咁多錢，而且可以同子華合作嘛。」

黃子華作重大犧牲剃頭，笑言如發哥這樣的紅星，也難逃剃頭的經歷。