黃子華從前替無綫拍的《男親女愛》、《棟篤神探》都叫好叫座，今年的《奸人堅》挾台慶劇之勢而來，子華揚言劇集播映一周後出街勢被人追打，更呼籲小朋友需家長指引才收看，而家長本身亦需指引。

子華的《男親女愛》、《棟篤神探》至今仍為人津津樂道，而今次子華信心更強：「個劇出街後嗰個禮拜六真係要匿埋唔出街，實畀人追打，個角色壞過之前嘅形象……如果有形象嘅話都徹底冇晒，好離譜呀！超賤呀！」子華公開呼籲小朋友收看此劇時需有家長指引，而他亦希望家長本身收看時亦要家長指引。

吃盡苦頭
擅長創作的子華難免加入一些衰衰格格的身體語言、口頭禪在角色之中，不過他強調，必定對得住如假包換的「奸人堅」石堅。子華為尊重前輩，有意先拜會老人家，並大讚堅叔夠勁：「堅叔真係好勁，我嗰日出街食飯，已經有人叫我奸人堅。」其實由「余樂天」到「莫作棟」，子華演繹的角色離不開衰衰格格，不過他卻這樣形容：「嗰啲不過係清湯啫，爆笑得嚟好斯文，但『奸人堅』就好似牛鞭、海馬咁，包保你哋流鼻血。」

雖說是搞笑戲，但子華落足心機去演，他坦言希望得到觀眾的認同，問到是否最滿意的作品？子華說：「睇觀眾啦，但呢個劇係拍得最辛苦嘅一套，我啲戲唔係打人就係畀人打，日日開工，其他同事見到我就問『今日係咪畀人打？』有場戲我畀人掟番茄，足足掟咗四十五分鐘，嘴角損咗，痛到呆咗，搞到我發脾氣。」至於拍檔葉童，子華坦言合作有火花：「不過好頂唔順佢個樣，唔攞你命都對你唔住，同佢談情難度好高。」

冇攞獎命
對於劇集被選為台慶劇，令他有機會爭「最佳男主角」獎，子華卻說：「一定唔敢諗攞獎，我冇攞獎命，點會有奇迹吖。」

近日子華除了忙着宣傳劇集，並開始為十二月的棟篤笑騷《越大鑊越快樂》籌備，他形容今次是上個騷《兒童不宜》的延續，是個黑色版的《兒童不宜》。

黃子華形容「奸人堅」比「莫作棟」更衰格，相信觀眾更加喜歡。