張智霖（Chilam）敗給黃子華失掉視帝寶座，不過前晚子華出席電視劇結局晚宴，Chilam失驚無神帶酒踩場，兩雄更「世紀合照」，身體力行粉碎不和傳聞。Chilam和子華又將合照上載到社交網公諸同好，隨即引來數千個轉發，並獲網民盛讚為「最完美的結局」。

黃子華憑無綫劇《My盛Lady》「香廣男」一角擊敗大熱的「Cool魔」張智霖，成為本年度無綫視帝，而坐歪當上「民選視帝」（最受歡迎電視男角色）的Chilam上台講致謝詞時的「義氣仔女論」引起議論紛紛，更傳出他與子華不咬弦的消息。不過，前晚子華趁《My》劇大結局與台前幕後食飯，Chilam竟以神秘嘉賓身份現身，兩雄識英雄重英雄，不停舉杯鬥酒，更攬實合照，兩人更將合照上載到社交網，隨即成為網友爭相轉發對象。

高層梁家樹撮合
據悉，今次兩雄相遇，全拜無綫高層梁家樹所賜，原來梁前晚相約Chilam於銅鑼灣食飯，《My》劇演員則於尖沙咀吃飯，梁便叫Chilam跟他過海踩場，Chilam更買了一支靚酒當賀禮，與子華分甘同味。梁又指子華與Chilam是好友，Chilam更讚子華在《My》劇表現好，子華攞視帝令他心服口服。

子華昨接受電話訪問時坦言：「好介意啲人話我哋不和，我認靚靚（袁詠儀）係表妹，所以唔想影響親戚關係，今次只不過係喺唔同嘅賽制下，形成唔同結果。（你兩個傾咗啲咩？）冇特別解釋過件事，總之今次見面，已勝過千言萬語，係好好嘅聖誕禮物。況且Chilam帶咗支堅嘢（酒）嚟，我好快都醉咗。」

子華更自爆早前於阮兆祥個唱，曾主動與Chilam握手，想恭喜他攞視帝，並說：「因為早年我同林保怡握過手，佢跟住就攞視帝，估唔到今次咁，總之我同Chilam都係被動。」他又謂曾與靚靚通電話，當提起與Chilam傳不和，靚靚即笑說「黐線咩？」而靚靚日前在內地出席活動，期間巧遇關之琳，兩人爭取機會合照。

未遇到吸引劇本
Chilam昨接受電話訪問時則說：「尋晚同子華飲酒傾偈，應該係咁嘛，大家都有傾過想合作，但未知咩形式，有可能電影、電視劇，甚至其他方面。能夠同子華合作，我梗期待。」至於Chilam昨日表示前晚將座駕泊於銅鑼灣，事後過了海會子華，想不到喝醉了，他說：「我依家要由屋企（淺水灣）行山路去銅鑼灣攞番架車。」談到外傳他與無綫的合作計劃有變，他澄清說：「唔會，總之《衝上雲霄》電影版嘅劇本仲執緊，我估要押後到出年8月先開機，至於電視劇就未遇到吸引嘅劇本。」

張智霖有與子華傾合作，但形式未定。

張智霖前晚踩場賀黃子華封視帝，兩人更攬頭攬頸示好。