大陸拍劇勁減25磅 黃子華:係女都驚咗我!

2001 | 東方新地 | #205

一直在內地拍攝電視劇《溥儀》的黃子華,為了宣傳與梅艷芳合作的新片《男歌女唱》,特別抽三日時間返港;眼前的子華,頭髮短了,面容消瘦了,而心情亦似乎開懷了,連以前絕口不提的前女友Sharis,這天他亦大方承認彼此再見亦是朋友,不過談到有沒有復合機會,他卻扭扭擰擰,並自怨道:「我都唔夠關心人!」子華又埋怨如今很難認識女仔。

拍戲為避靜

為了飾演「溥儀」一角,黃子華除了要瘦身25磅,還要逗留內地五個多月,抵受零下10度的嚴寒氣溫,他亦笑言有點自作孽,不過他仍視這項工作一大挑戰,「做溥儀呢個角色有啲難度,不過我就想趁呢段時間反省下自己,因為之前喺香港發生太多事,個人好亂,靜咗咁耐發現,原來自己唔識關心人,女朋友係,家人朋友都係。」

否認為情消瘦

短短日子瘦25磅,是否受感情困擾呢?「唔係,我專登減肥嘅,我依家一日食一餐,對於我呢個咁鐘意食嘅人嚟講,簡直辛苦到不得了。」對於緋聞,子華謂已經見怪不怪,早期有DoDo姐鄭裕玲,以至近期的郭羡妮,對於這兩個女人,子華都讚口不絕,「DoDo姐係一個好專業嘅女強人,我好尊敬佢。至於郭羨妮,好多人問我點解搵佢拍《一蚊雞保鑣》,原因係佢雖然靚,但唔介意唔靚,我欣賞佢呢個態度。」

冇途徑溝女

不過由於連月來忙於拍戲,子華坦言己沒有與郭羨妮聯絡,現在感情片空白,不是不想找個伴,只是沒有途徑識女仔,「我又唔鍾意蒲,冇野做我就留喺屋企,有時都係約埋幾個麻甩佬出嚟飲嘢,而且家陣仲邊有女仔肯同我食飯,一俾記者發現就狂影,係女都驚咗我啦!」至於有否打算與前女友劉婉君Sharis復合?他卻說暫時不會,還自怨道:「我都唔夠關心人!」

最掛住牛什

離港個多月,子華最掛念並非前度女友Sharis,而是大排檔的美味牛什,小記為了還其心願,特別約他到以前經常幫襯的大排檔,「我以前喺加拿大讀書,曾經為一碗牛什心掛掛到成晚訓唔著,今次呢碗牛什足以俾我頂幾個月癮㗎喇!」

踢爆阿梅鍾意大隻佬

說回電影《男歌女唱》,面對阿姐級的梅艷芳,子華並未感到壓力,因為梅姐同DoDo姐很不同,梅姐的感覺是朋友味道重些,「你會覺得佢(DoDo)好support你,我哋可以話一拍即合,有啲人話你會合作完就唔想再見, 不過梅姐就梗係無任歡迎啦。」

自認核突

子華謂今次的角色比之前的余樂天更癲,是瘋狂愛唱卡啦OK,最搞笑是要教梅姐跳舞,「簡直可以用核突嚟形容我嘅舞姿,梅姐一路睇一路笑,仲冤住面話『子華你啲舞真係好難學喎!』」對於梅姐已經找到新男友,子華竟說,「點解冇人傳我同梅姐呢,我都有啲出奇,可以梅姐鍾意大隻佬,我咁瘦唔夠格啩!」