吳鎮宇 x 黃子華 閒話多說

1997.04.25 | 壹週刊 | #372
某年某月某日。

劉青雲對吳鎮宇說:「喂,我識咗一個人,好正好正㗎!」

然後,劉青雲又對黃子華說:「你以為你識講笑呀?咁你要聽吓吳鎮宇點講笑嘞!」

就係咁,鎮宇子華認識了,兼且做埋好朋友。

因為功課做不足,還以為他們合作過很多很多次,唔講唔知,其實二人碰口碰面講演技的合作機會不算多,舊的有部《亂世超人》,新的有套《猛鬼通宵陪伴你》,僅此而已。

原來,好友共聚,唔一定要講大問題大心事,通常都是食吓飯賭吓錢講吓笑,當然,還有講人閒話啦!

諗落原來大家都係咁樣做朋友啫!

吳:吳鎮宇  黃:黃子華

有數得計

吳:講!做八場《棟篤笑》,賺咗幾多錢?

黃:如果講明俾你聽,你唔使做功課啦!其實有數得計,250蚊,180蚊,120蚊,總共一場2,500人,場場爆滿,識乘就識乘,唔識乘我都幫你唔到。

吳:啲觀眾唔得閒同你計,用層樓嚟計,買到邊度?

黃:深水埗豪宅 ── 首期囉!

吳:咁大家心中有數啦!

黃:吳鎮宇,咁你舊年拍咗幾多部戲?

吳:十部!

黃:搵咗幾多錢?

吳:有五套係客串,仲係封封老毛(利是)嗰種。

黃:你呢世收過嗰啲老毛,最多係幾多吖?

吳:入落利是嗰啲呀……皮零嘢囉(萬多元)!(最少呢?)我未試過呀!聽講黃秋生試過幾嚿水,五嚿水呀!最後淨係拎個利是封走囉!

黃:咁你今年有乜計劃先?

吳:繼續拍戲囉!

黃:今年賺五百萬夠不夠?

吳:差唔多啦!

黃:如果賺五百萬,或者賺三百萬加一個影帝獎,你寧願要邊樣?

吳:五百萬五百萬五百萬!大佬呀,奶路臣街都有價㗎!你睇唔睇到呀,奶路臣街都有好多獎牌㗎!雖然個設計有專利!

影帝

黃:嗱,(電影)評論學會就封咗你做影帝,金像獎就連提名都冇!老老實實,你對金像獎點睇先?

吳:我絕對支持!喂,每個獎都有佢嘅規矩,咁人哋喺金像獎得到認同,又的而且確演得好吖!你唔可以否認呢樣嘢喎!

黃:人哋演得好,你都演得好啫!

吳:當然啦!

黃:你唔好理人哋點先,你自己順唔順氣吖?

吳:嗱,吳鎮宇就冇唔順氣嘅,不過靚坤(《古惑仔之人在江湖》角色)就有少少微言!好得意㗎!每做完一套戲,你都會將個角色當咗係朋友,甚至乎係你身體入面嘅一部分,咁嗰小部分會咦咦哦哦囉!但吳鎮宇整體就冇乜嘢!

黃:唔怪之得有傳聞話你做靚坤做到好投入,嗰陣出到街都好似想打人咁,係唔係真㗎?

吳:呢個傳聞就係由我傳開去嘅!

到我問!黃子華,做咗咁多次《棟篤笑》,有乜改變先?

黃:主要係身形愈嚟愈改善,以前着唔起,而家着得起,就係咁之嘛!仲有,老實講,娛樂圈真係人靠衣裝,唔到你唔承認,特別係你識到一啲叫吳鎮宇咁嘅朋友,私底下同佢出街,佢都要裝身個半鐘,你就會覺得,真係要咁做㗎!

吳:喂,吳鎮宇就讀中學嗰陣套校服都要諗個半鐘至出街㗎啦!我識嗰個黃子華,其實都係個鍾意裝扮嘅人,只不過我選擇得慢,就要個半鐘,佢選擇得快就半個鐘,貪靚程度都係一樣,可能佢隔晚諗定着乜衫呢!

黃:我以前接受嘅訓練,做戲就係做戲。但喺香港嘅娛樂圈,完全唔理(外表)係唔得㗎!我記得有一年做《跟住去邊度》,影咗張poster,眈天望地好樣衰,嗰次琴姐有去睇,一見到我就話;原來你真人靚仔好多喎!即係話,就算你做得一樣咁好笑,一樣咁好睇,靚仔嗰個就係好好多!

吳:咁內容方面呢?你啲《棟篤笑》,家姐細妹阿爸阿媽咁多人,係唔係捏造出嚟㗎?

黃:嗯,我素來都講,我做《棟篤笑》係半真半假,但假嘅都係根據真實嚟捏造,我唔使一定去秦城監獄啫,去赤柱都得啩!

到我嘞!據我所知,你喺娛樂圈最長遠嘅理想係做出品人,做乜咁諗先?

剝削人

吳:好簡單!因為可以扣除一切中間人利潤,我知許冠文都係咁做㗎!

黃:即係話,自己做剝削人嗰個,就好過俾人剝削!

吳:如果有個concept係你一手策劃嘅,你係咪應該賺多啲吖!如果電燈係愛迪生發明嘅,佢應該係賺錢最多嗰個!

黃:如果賺錢對你咁重要,你做乜揀電影噃!好多嘢都比電影賺錢啦!

吳:係吖!但我嗰個年代,拍戲可以登台,登台可以有契媽送銀紙牌,帶動好多副業,點知而家冇,我都冇計㗎!

黃:有冇覺得生不逢時?

吳:冇得講,你入行嗰陣,你又唔係五虎,咪捱吓囉!捱到而家叫做識做吓戲,就咁,都冇得講啦!

黃:你覺得自己幾時開始識得做戲㗎?

吳:尋日!

黃:嗱,尋日就係電影金像獎頒獎典禮,你就尋日至識得做吓戲!

吳:我意思係近來,唔關金像獎事!

好Mark哥

黃:老實講,吳鎮宇的演技資歷,都有一定嘅認同,主角做唔少啦!但喺我哋眼中,好似未曾做過一套大戲嘅主角喎!

吳:大戲?羅家英做嗰啲呀!

黃:羅家英做配角,你做主角嗰啲大戲呀!對你嚟講,呢樣係咪一個問題先?

吳:唔係!你講嗰啲,係budget同演員嘅market問題。我反而係戲種問題,譬如話,吳鎮宇做唔少反派嘞!佢可唔可以拍吓愛情片呢!演戲都係想抒發一啲感覺,我會想做吓一啲愛情小品囉!

黃:咁有乜辦法令人信服,整個楊采妮俾你嘆吓啦!

吳:個辦法就係要個導演夠薑,或者灌醉佢簽約囉!

黃:其實我哋大家喺處等緊,摸緊。

係,我哋今日都未收到一千萬、二千萬,但有個信念係,唔,有一日,俾我哋砌到個角色,係嘞,就係嗰個人嘞!周潤發都做咗好多年票房毒藥,至等到個Mark哥啦!

吳:但周潤發有冇先知先覺呢?我諗佢都係幾被動。但我同你都好似屬於幾主動嘅人,我哋應該話俾人聽,其實我哋都可以好阿Mark㗎!

黃:或者應該再加強個主動性,我記得以前有個叫John Bulushi嘅喜劇演員,後尾因為吸毒過多死咗。有次佢喺酒吧見到史匹堡,就當場做咗半個鐘頭日本人嘅戲,叫史匹堡俾佢做個日本人。你點可能諗佢做日本人呢!但可能我哋真係需要咁做㗎!

冇冇冇

吳鎮宇說:「黃子華係個幾有計劃嘅人,佢話寫緊劇本,佢一定係寫緊;就算係一啲投資項目,佢嘅計劃性都強過我好多,佢啱啱至教咗我點買股票,好似好笨咁,但我真係連呢啲都唔識。」

黃子華說:「啲嘢唔諗定先,我覺得會死㗎!但吳鎮宇唔會,佢會話,得啦!行出嚟咪得囉!唔會死人嘅!我係一個冇安全感嘅人,佢係一個冇冇安全感嘅人。」

一個冇加兩個冇,結果都是一樣。由認識的第一日到今天,吳鎮宇黃子華都是得閒食吓飯賭吓錢談吓笑講吓閒話的好朋友。

祝友誼永固!