黃子華潤梁朝偉鎯鎯未化妝

2010.11.04 | 太陽報

黃子華將娛樂圈血淚史搬上舞台,自爆因樣衰被女星拒絕拍接吻戲,又揶揄梁朝偉「鎯鎯」,甚至斗膽將整容與鄭裕玲串連一起。不過,Solo八個晚上,保守估計將為他帶來二千餘萬元收入!

前晚一連八場的《黃子華棟篤笑20年娛樂圈血肉史II》在紅館開鑼,在欠缺宣傳下仍掀起撲飛熱,不少圈中人包括鄭裕玲、鄧健泓、原子鏸、劉青雲、郭藹明、吳鎮宇、胡楓、徐天佑及許鞍華等前來捧場,子華亦不負眾望將全場氣氛炒熱,更自揭因樣衰遭某圈中女星拒吻:「拍接吻戲,佢因為宗教理由話唔得,但點知轉頭佢就去同任達華拍喎!好彩當日我冇問佢信咩教,如果唔係咪攞嚟瘀囉!」

嘟嘟勸「執執個樣」
由於樣子不算出眾,子華自爆當年憑《男親女愛》走紅後,曾遭鄭裕玲勸喻去「執執個樣」,令全場嘩然!隨後愈說愈踩界,連梁朝偉也被請「出場」,子華說:「演員適當時就要除褲,好似劉青雲同吳鎮宇呢兩個受尊崇嘅演員,咪又係打出Pat Pat出嚟喺大銀幕慢慢行!梁朝偉喺《色,戒》度唔單止演漢奸,佢仲係中國國際鋼琴大師,知唔知邊個?郎朗呀!有需要就除褲,最多畀個好啲嘅化妝師我,幫『鎯鎯』化妝,雖然我唔知點樣嘅『鎯鎯』先叫好睇!」語畢,全場掌聲雷動。

此外,當年子華開拍電影《一蚊雞保鑣》,票房慘遭滑鐵盧,驀然回首。他竟可以開懷自娛:「死都要死喺自己手上,有人話戲名已經預測到票房,最絕係再有人同我講『應該改名叫《一蚊雞棺材》』梗係啦!一蚊買到副棺喎!咪即係『抵死』囉!」

劇集仆直患抑鬱
事業浮沉之際,他曾減去四十磅,花上四個月時間逗留在內地扮演末代皇帝溥儀,最終收視未如理想,更患上抑鬱症,可謂得不償失。他又笑指其實不少圈中人正忙於趕拍《狠狠的等》:「呢方面女演員最慘,都未做過中女,就已經變咗人阿媽!苑瓊丹第一次同我合作做我女友,喺《男親女愛》已經變咗我姑姐,如果再合作,我相信佢會係我阿媽,但係大家要知道,其實佢細過我㗎!」

綜觀當今娛圈趨勢,子華半真半假地說:「入得娛樂圈個個都有病,車震道歉、偷食道歉、結婚又要道歉……大佬呀!張子強同葉繼歡都未道歉,我哋邊有資格出嚟道歉呀?」他直言絕不會因被揭私隱而公開道歉。談到當年曾投考警察,子華趁機諷刺時弊:「不過我個樣唔似(警察),如果考到去查人身份證,問人哋屋企係租定買,佢答我買嘅話,我就會斷定佢唔係香港人,乜香港人仲買得起樓咩?」

1104-00470-010b1

子華開騷講自己的血淚史,還論盡不少圈中事。

1104-00470-010b2