黃子華尾場感言用智慧愛港

2014.10.18 | 明報

黃子華一連11場的《唔黐線 唔正常》前晚圓滿結束,今次遇着佔中事件,社會引發警民、家庭關係撕裂,子華每場騷除送給大家笑聲,更想大家反思、感動與感慨。前晚尾場,黃子華在尾聲說出一番感言,形容無論是市民與政府都愛香港,雙方都不想把香港這個被扯來扯去的BB扯死,接着就是考驗大家的愛,對香港這個BB,如何愛下去。

開騷總遇大事發生
黃子華前晚尾場棟篤笑,同屬視帝級的黎耀祥、影帝劉青雲及李嘉欣到來捧場。黃子華狀態大勇,觀眾反應更熱烈,臨近尾聲時,子華沒有如過往般完騷便走,面對萬多現場觀眾說:「每晚我一做完就走,今晚尾場啦,我想講多幾句才走。係有點感觸,我由1990年開始做棟篤笑,97回歸有做,然後金融風暴。03年沙士(SARS),逢大鑊都有份,沙士全場只得一個人無戴口罩都照做,無戴口罩那個人就係我,你話幾等錢使呢?全場掩住口咁笑,我有我自己講。跟住又有金融風暴,然後做做吓打風落雨,無得做,但係呢一次,佔中!又有我份。」

兩邊角力都惜住「BB」
黃子華談到佔中心情忐忑,他說:「我好坦白同大家講,由第一日佔中我睇住電視,我即刻諗到﹕『嗯,我呢次應該做唔成。然後我可以話畀大家聽,我每晚都預了明晚無得做,呢個唔係好得意嘅事,因為每晚都有事發生,每件事發生都可以令我無得做。好簡單講,如果有一晚有一隻『雞蛋』(指市民)碎咗,我就無得做,我相信大家都無興趣聽,我亦都無心情做,所以能夠經過咁多晚做完。其實呢件事都發生咗10幾20日,我覺得乜嘢促使今時今日仍做緊呢?其實係香港人好愛香港。亂咗咁多日,都無碎過一粒雞蛋,係好唔容易。我又舉個例,一個BB仔,一邊扯住佢隻手,一邊扯住佢隻腳,但其實大家都惜住呢個BB仔,扯咗20晚都無扯『瓜』佢,點解?因為大家都惜住佢,只要一方大力扯……一粒碎咗,後果好嚴重。」黃子華以BB比喻香港,被市民及政府各扯一邊。

考驗大家如何走下去
子華續說:「所以今晚最後一場提醒大家,由第一日開始這個運動因為愛,無論政府或者市民,希望大家更加要想想,跟住要點『扯』呢?如果一邊扯得好實唔放,另一邊又扯實,就會扯『瓜』佢了,這個愛係真正的考驗。希望大家有智慧,多謝大家!」黃子華眼濕濕講完「扯BB論」,全場報以掌聲,他才結束整個棟篤笑演出。

1413571358226_c44efb01a2ca428bc35a505f946664fb

黃子華一連11場棟篤笑圓滿結束,臨完場時,子華以「扯BB論」,向現場逾萬觀眾發表感言。