黃子華為甩身 擺古天樂上枱

2002.07.12 | 東方日報

《洛神》一班演員郭羨妮、馬浚偉與陳豪等,昨日齊參與遊戲節目「一觸即發」,最巧合是連同主持人黃子華在內,所出席之三個男藝人,全部都跟郭羨妮傳過緋聞,可謂「仔仔一堂」。

拉埋蔡少芬落水
節目錄影前各人在台上玩試跌入洞,影大合照時記者把握機會邀請子華與郭羨妮合照,兩人表現十分大方,完全無抗拒,記者再要求郭羨妮跟三位緋聞男友合照,郭羨妮立即行開話飲水,而「三兄弟」又拉埋蔡少芬落水,郭羨妮才肯行埋去合照。

其後各人在化妝間等候入廠錄影,子華在記者簇擁下行入化妝間,終於完成這張「緋聞男女」大合照。

馬仔寸子華「大師兄」
最搞笑是黃子華,竟然想置身事外,說給機會郭羨妮澄清「佢哋」之複雜關係,以及做乜搞到成班「師兄弟」咁,反被馬浚偉寸他才是「大師兄」,子華立即死撐:「你當古天樂死㗎!」

陳豪請食飯要倒貼
雖然曾經傳緋聞,加上在昨日一眾藝員中跟郭羨妮最熟,但子華強調絕對不會對郭羨妮偏心,還笑言「個個都咁錫」,子華果然講得出做得到,郭羨妮第一個被淘汰出局。由陳豪勝出,贏到九千五百元獎金,其中一半將撥捐兒童癌病基金,他笑言所得之四千多元獎金,連請大家食飯也未夠,相信要自己倒貼。

至於郭羨妮跟一眾「緋聞男友」同台,亦覺得好笑,但強調絕對不介意影合照,她笑言好彩未有跟羅嘉良合作過,否則羅嘉良傳婚變,一定又與她扯上關係。