【領養,不購買】黃子華行山遇浪浪想收養 第二日搵唔番…

2016.12.04 | 蘋果日報

黃子華今日喺中環出席支持領養寵物既活動,佢話同活動搞手係朋友,所以唔收錢都嚟支持。

以前黃子華都有養過大種狗,心目中亦有名種狗想養,作為一個負責任嘅狗主,佢諗咗兩年幾都未決定到。結果,子華早前行山,就遇到一隻流浪狗BB:「佢好慘,仲要奀奀聲,打破咗我想買(狗)嘅心,想帶佢返屋企。」

可惜子華同呢個BB緣份暫時未到。「第二日拎晒袋同蘋果,點知搵唔番佢。之後有個朋友又有另一隻流浪狗,我決定養,依家互相適應咗兩、三個星期。」

子華有冇諗過養人?佢話:「廿年前我提議養人,不如去保良局,有能力就助養或者領養,需要嘅愛心要更大,想生仔就領養一隻狗先,養狗都好大挑戰。」至於係咪試下先養狗後養人?黃子華笑:「緣份嘅嘢好難講,可能有日行山,有個細路好似紅孩兒咁樣,走埋嚟叫我Daddy。」

紅孩兒,即係魔王及鐵扇公主個B。

1480839201_6783

1480839204_bbf7

1480839203_0203