2000年由黃子華同嘟嘟主演嘅無綫喜劇《男親女愛》，最高收視50點，創造咗香港TVB神話。今年收視最高嗰套《護花危情》都係得37點，差成13點。加上王維基嘅香港電視又步步進迫，不斷撬人走，無綫要重上當年佳績真係要諗諗計。

新一年無綫已經度好對策，有報道指無綫金牌監製徐正康承認搵咗嘟嘟同子華拍《男親女愛2》，預計4月開拍。嘟嘟喺報道中就表示：「我都好希望再拍子華，為公司出分力。」但據知實情冇咁易搞掂嘟姐，而嘟姐今日都講咗唔拍。有指無綫以銀彈利誘兩位，分別俾每6萬嘟姐同5萬子華，更承諾每日唔會拍超過10個鐘，祥仔分分鐘都冇咁好待遇。

子華拍過嘅無綫都有收視保證，有見及此，同珍姐打對台嘅梁家樹有意搵子華加準備回巢「還債」嘅佘詩曼拍《絕代雙驕》續集，不過聽聞子華今年得一個檔期咋。如果嘟姐真係唔願拍，咁開《絕代商驕2》嘅成數就高好多。

呢個由「試味」帶出嘅世紀之吻，當年睇《男親女愛》嘅觀眾，應該都好肉緊了吧？（劇照）

阿Lok寸爆Miss Mo金句：「荷爾蒙失調，內分泌失敗，一出世就更年期！」

今次子華唔知可唔可以打破自己嘅紀錄呢？