在娛樂圈十多年，過去一年，肯定是黃子華事業最得意的時期。不過，這一年卻讓子華感到從未有過的沉重，令他幾乎窒息，生活陷於一團糟。面對極速竄紅，與鄭裕玲疑幻疑真的緋聞、女友傳仰藥自殺、傳媒二十四小時貼身追蹤，壓力之大是他這生人從未承受過的。子華說：「這段期間實在係太長久嘅精神轟炸！」
去年，黃子華憑《男親女愛》成為全港人氣最強的藝人，人紅了自然有緋聞，於是傳他與鄭裕玲日久生情，成為呂方的情敵。
那邊廂，子華的女友劉婉君又被人拍得另結新歡的照片，令眾人關係錯縱複雜。劇情又峰迴路轉，劉婉君突然入院，傳是為情自殺。事件的男主角子華說，他當時被這麼密集式的突襲弄得頭昏腦脹。
「我需要離開一下」
沉重的一年總算是熬過了，回望過去一年發生的事，子華作了很多反省，他說發現了一些自己的不足，並找尋方法去改善自己。對子華重提這些舊事，本來以為他會迴避，沒想到他又落落大方的回應。且聽聽他的剖白：
「嗰一年無論係來自個人或者外間嘅壓力，都係最沉重嘅一年，係一段幾難度過嘅時間。坦白講，我接拍大陸劇《溥儀》，要離開香港幾個月，其中一個原因係我想收埋自己，匿埋工作。過去一年實在有太多新聞發生，喺香港實在受住太長久嘅精神轟炸，我需要離開一下。
「我覺得最有趣嘅係當我嘅事業不斷向上升、最得意時，我嘅生活就係最下沉時，嗰種張力真係好奇妙。」
或許這就是成名的代價，如果當其時的子華不是那麼紅，現在的結局可能不是這樣。這點他也很讚同。
2000年無綫劇集《男歡女愛》將子華的事業推至最高峯。
「係囉！就係！冇咁多人注意你嘅事嘛。傳媒係畀咗好多壓力我，我嘅私生活的而且確亦出現咗好多問題。但係你問我怪唔怪傳媒？我成日覺得點去怪啫？傳媒唔係一個人嚟，係一種建制、文化，香港太細，傳媒嘅網絡係舖天蓋地之咁繁密。畀佢哋跟當然係唔舒服，有啲藝人會好氣憤，出來鬧佢哋，但咁做等於對空氣嚟鬧，冇人會應你。就等於你鬧資本主義，資本主義根本就唔會回答你。」
子華與吳鎮宇張達明合演《鬚根Show》，叫好之餘亦為他帶來豐厚的收入。
替劉婉君抱不平
不知是否因為子華這種對傳媒的態度，令傳媒筆下的他，在整件事中都擔演受害者的角色，而事件女主角劉婉君，則被形容為用情不專的不及格女友？劉婉君承受的壓力其實絕不比子華少，子華為此替舊女友抱不平。
他感慨的說：「其實成件事對佢（劉婉君）都非常唔公平，呢件純粹只係兩個人之間嘅事，任何人搭嘴都唔明箇中理由。我真係唔知應該對外人講乜好，有邊個了解成件事呢？只有我哋自己。」
與劉婉君分手大半年，子華說現在與對方已較少聯絡，而他亦已搬離何文田的舊愛巢，現在只是租酒店住。
子華說：「係呀，我搬咗一段時間㗎喇，以後都唔會再住呢個地方，點都算係傷心地嘛！不過我由細到大都係住何文田區，或者都會住番呢區，不過遲啲先再算。」
「我覺得自己係戇居佬」
而當子華與劉婉君的感情畫上句號時，他又被傳出與其執導電影《一蚊雞保鑣》的女主角郭羡妮秘密拍拖，看來他這一年也很有桃花運。
提及這段緋聞，子華巧妙地沒有回應緋聞的真實程度，反而來個自嘲一番：「咁你話我唔走點得呢（離開香港）？依家啲傳聞係毫無證據，只係話某人見到喎，我都唔 Mind（介意）喇，你鍾意咪講囉。但係我從來都冇諗過自己嘅形象可以咁，嘩！緋聞纏身喎！我何得何能呀？我覺得自己係個戇居佬之嘛，真係唔了解人哋點睇我。」
問子華現在的感情生活如何？他合上嘴巴笑一笑，然後攤開兩手，不知是指「無可奉告」，還是「空白一片」，用身體語言來回應。後來子華又補充：「我有太多嘢需要檢討了。」
自我「反省期」
子華說他將與劉婉君分手直到現時這段期間稱為「反省期」，這段時間他甚少曝光、默默的工作，更不斷的反思自己過去的犯錯、做得不足之處，有什麼可以做好些：「我嘅反省唔單止係感情上，重有事業、生命方面。我覺得自己第一步要做嘅係個人生活要處理得好啲，要去話畀愛錫我嘅人知道我都好愛佢哋、去 Appreciate（感激）對我好嘅人。我覺得自己以前唔夠愛身邊嘅人，對佢哋嘅關懷唔夠，但依家會嘗試去 Show 出嚟，畀佢哋有溫暖嘅感覺。」
子華反省過後反而變得比以前更積極，指的是在表達自己感情方面，而甚至對婚姻的看法，他也沒有以前那麼悲觀。導致他對婚姻沒信心的最大原因，是他於破碎的家庭成長，父母離異，及後又各自再婚。
八九年子華與洪朝豐（左）、鄧梓峯（中）一同主持亞洲電視的《晨早直播室》。
對婚姻不再說不
個多月前好友張達明結婚，子華因身處長春拍《溥儀》而未能出席，對身邊老友結婚，子華的反應是：「咦！係喎。原來我的朋友都係會成家立室嗰類型喎。其實我細個好抗拒婚姻，唔單止因為我自己係喺破碎家庭長大，我有兩個老竇、兩個阿媽，我身邊好多好朋友都係來自破碎家庭，有個朋友嘅老竇有四個老婆，有個朋友老竇攞晒屋企啲錢走咗。
「不過，依家就唔會對婚姻去落定論，最重要睇下係咪搵到個適合嘅人，令你好想同佢進行繁文縟節、結婚嚟高興下。但咁耐以嚟我都暫時未遇到個咁嘅人。」
在子華的這段反省期中，其實他也做了很多工作，其中還包括完成了兩部電影《男歌女唱》和《一蚊雞保鑣》。其中《男》片更會於本月底上映，這次子華回港數天，主要也是為此片宣傳，否則他會更長時間的收埋自己。
《男》片中，子華將與梅艷芳飾演情侶，他更會在片中教梅艷芳唱歌！子華說：「其實《男》片個古仔係我構思嘅，女主角亦係我建議搵梅姐做，我覺得係佢先有嗰種歌后嘅感覺。雖然戲名同《男親女愛》有啲似，但兩樣嘢絕無關係。我演嘅角色基本上係個精神有問題，長期處於過High狀態嘅人。」
排骨華
原來唔止呂良偉同湯漢斯至為部戲增肥、減肥，子華亦為《溥儀》一劇減去25磅，由155磅變為現在的130磅，成為「排骨華」，所以他近日聽的最多的一句話是：「嘩！我幾乎唔認得你呀！」但無處不在的狗仔隊依然毫無懷疑地就認出他，眼力驚人！
子華說：「我由大陸返香港第二日，同個朋友喺天文台道咁僻嘅地方出現，都突然間有狗仔隊彈出嚟影相。我諗住我咁瘦，連啲朋友都話唔認得我，應該狗仔隊都唔認得㗎啦，但佢哋都一眼認出我，真係犀利！」
嘩！緋聞纏身喎！我何得何能呀？我覺得自己係個戇居佬之嘛，真係唔了解人哋點睇我。