黃子華的哈痞精神

2005年2月1日 | TVB 周刊 | #400

黃子華,只會想到他搞棟篤笑騷、電視劇〈男親女愛〉和〈棟篤神探〉。
搞「音樂」?只會想到他那以讀字式唱法的〈關老三〉和〈小小強〉。
「咁睇我?太表面喇!我好記得當我想做棟篤笑,畀人話我個樣唔出聲惡死,邊會識得搞笑,叫我唔好做。
如果我真係咁容易受周圍嘅人影響,佢哋叫我唔好做就唔做,就唔會有今日嘅黃子華!」
懶理閒言閒語,子華自資出碟,找來三位年青人,建立自己的音樂王國,宣揚「哈痞」精神!
今次整個訪問變成了三人嘅家常閒話,四個男人都可以一個墟。記者經常被他們帶去遊花園,幾經辛苦才可以插咀問幾句。點解唔係四人?因為18兄用結他代口,彈結他多過說話。

【多得他】

「哈痞」四子今天可以走在一起,要多得音樂監製羅金榮 — 阿 Wing。

子華,你幾時學結他㗎?

華:我細個已經學彈結他,中學時上過台表演。到喺外國讀完書返黎自己一個人住,買咗個電結他返黎諗住得閒可以彈吓,成千幾蚊,結果太忙冇彈過,搬屋嘅時候送埋俾人。四年前想學番,就搵阿 Wing 介紹。

18:就係搵咗我教子華彈結他。

華:第一次同佢夾,佢居然識得彈我隻〈小小強〉,仲要彈得好熟!

18:因為當時錄〈小小強〉就係我彈。

華:我都真係唔記得咗!以前都有人叫我出碟,不過當時冇興趣。

18:咁我就介紹咗小明同巴比倫畀子華識。

華:阿 Wing 好支持我哋,仲借出旺角呢個私竇畀我哋夾 band 練歌,冇咗佢就唔會有今日嘅「哈痞」。

【夾 band 奇談】

有人話夾 band 的男人比情侶更親密。「哈痞」四子都一樣,友情緣於音樂,趣事亦緣於音樂。

差人搵上門

明:我哋試過最癲一星期差人有三晚走上嚟。

你哋畀人投訴?

巴:我哋喺5樓,嘈到上9樓。

華:呢度係商用大廈,租呢度係貪佢平、近我屋企、有私人廁所、夜晚又嘈唔到人。(突然提高聲線向上大叫)樓上9樓有人非法居民,走嚟投訴我哋。

咁差人上嚟點算?

明:三次都係叫我哋細聲啲就走㗎啦!我哋咪將音量調低,陰濕地繼續夾 band。

子華都唔識嘅歌

明:我哋好多時夾 band 到三、四點先走。夾 band 做啲乜?其實都係玩吓、吹吓水為主,大家係建立朋友關係,夾 band 反而係其次。

華:(喪笑)都癲嘅,凌晨12點幾喺度夾 Michael Jacky!

巴:我哋有夾徐小鳳、許冠傑,同啲唔關事嘅歌,好似賀年歌咁。

明:有啲歌子華唔識,不過佢聽我哋夾完,第二日就學識番嚟同我哋夾,真係勁!

巴:我哋會玩廣告歌、rap talk 仲會配埋音樂嚟玩!兩人即場 rap talk 了〈余仁生金牌固本培元鹿尾巴湯〉的廣告歌:「鋤得多傷氣力消耗一定要補充……」十分起勁,但子華卻一臉無奈。

華:都唔知乜嘢歌嚟!

(終於忍不住插口)我都聽過同識唱喎!

巴:子華唔係我哋呢個年代的人,嘻嘻!

一粒音的堅持

明:其實子華對音樂好有熱誠,佢反而會 push 番我哋。

巴:係啦,上次我哋為咗要夾一個和音位而彈咗成晚。

明:其實只係兩句嘅和音!

華:咁都係想大家做好件事。

巴:係好事嚟㗎!

明:子華真係好認真㗎!

【哈痞解話】

哈:取自 happy,意為開心。

痞:讀音「皮」,國內俗語,是街邊的小流氓。〈辭海〉中解作傷痛。

子華:「夾 band 唔一定要憤世嫉俗,哈痞以健康為題,歌曲內容反映人生百態、生命無常。」想知有幾爆,可以上呢個網址合法下載。
http://www.umimusic.com/happy

【哈痞 MV】

1月21日,TVB幫哈痞嘅〈妹妹〉拍咗個 MV,走出大草原,配合藍天白雲,非常好 feel!

〈妹妹〉呢歌係子華因為一位年輕女性朋友過身,有感而發嘅作品:「佢好年輕,畀我嘅印象係好快樂。我同佢交往唔深,但係佢嘅死對我嚟講好突然,原來生命係可以咁無常。」

【後記:哈痞轟趴】

「轟趴」係台灣流行語,用國語去讀就是「home party」的簡化字。

和哈痞做訪問有如開 happy home party,子華就像大哥哥湊細佬,靜靜的聽小明和巴比倫唱雙箕。看到18彈結他,子華自己也抱起結他向18請教。訪問時,子華見記者對哈痞一頭冒水,主動播歌給記者聽,更細心講解每一首歌,變成了試聽大會,遺憾的是看不到他們自拍〈馴服〉MV。