張達明 黃子華 鬥智鬥性……格

1999年7月10日 | 東方新地 | #084
怎樣才算 IQ(智商)高?賺錢多、位高權重的人先算 IQ 高手?答案統統都不是,IQ 高的人有智慧之外,還要有 EQ(情緒智商)。《狀王宋世傑(貳)》劇集中,張達明跟黃子華鬥過你死活誰是最後勝利者暫時還是未知之數,但現實生活中,刻意找一些顯淺的 IQ 問題來考他們,看看在這個環節中誰領風騷?!

張:張達明  黃:黃子華

IQ 問題:一隻凶猛嘅貓見到老鼠,點解即刻跑?
張:隻貓要捉老鼠,梗係要跑啦!
黃:係唔係隻老鼠太大隻,嚇到隻貓要走?(張答對)

IQ 問題:偷車賊見到一輛寶馬房車唔郁手,點解呢?
張:唏,因為架車係佢自己嘛!
黃:嗰個偷車賊見到自己架車。(兩個都啱)

IQ 問題:有10個傘兵坐直昇機跳傘,班長話跳出機後數30秒先至拉降落傘,結果有9個人平安着陸,一個人不幸身亡,點解?
張:俾我諗諗,係咪佢個降落傘壞咗?
黃:我諗梗係個班長整蠱佢。
(正確答案係不幸身亡傘兵患有口吃。)

IQ 問題:邊啲人日日去睇病?
張:(斬釘截鐵的說)醫生。
黃:日日要睇病,係咪醫生呢?(兩個都啱)

IQ 問題:點解暑假一定比寒假長?
張:嘻嘻,冷縮熱脹嘛。
黃:點解暑假比寒假長?死啦,我真係唔識答!(張答對)

經過一輪激鬥之後,張達明似乎略勝一籌,這並非代表他的 IQ 遠勝黃子華,而是達明比起子華玩得更投入,雖然這些 IQ 題非常Easy,但達明答完一題 IQ 題即刻問:「再嚟,放馬過來。」

若說到邊個 IQ 高,他卻說:「冇得比,子華係我師傅嚟㗎,我有好多嘢係佢身上學返嚟。」

單憑幾條 IQ 問題未必知道邊個 IQ 高!但講 EQ,達明係高些少嘅!

大家唔好睇小 EQ,因為 IQ 高未必等於有同情心、自律、自我察覺、應變能力、領導才華……簡單而言,性格控制命運!

達明想奸

張達明入行至今所演的不是搞笑就是忠角,其實他的夢想是演奸角,可惜直至現在無人問津,達明重申一句:「我要奸起上嚟可以好奸,大家考慮下啦!」

有說黃子華飾演癩皮三搶了狀王張達明不少風頭,是否一山不能藏二虎呢?達明笑說:「我哋三虎(加埋吳鎮宇)一樣咁藏啦!何況只係二虎添!兩個人如果太相似反而唔好,一忠一奸先至多人鍾意睇嘛!氣氛會好啲。」

達明自覺 IQ 只屬普通,他認為聰明之餘亦要有親切感,而其貌不揚的他拍劇能夠打入家庭已經心滿意足,他相信凡事不要去得太盡,得到自己應得的便算,他笑言這是個人最大的弱點。

子華練腦

「棟篤笑」表現出黃子華的聰明才智,讓人拍案叫絕。但經過一連串 IQ 問題測試之後,子華坦言腦根並非太好,因為「棟篤笑」題材是靠長時間的思考以及堆砌而成,絕非兩三日間就做得到。

「嗰啲考智慧嘅書,話就話適合小學生去看,但係有啲問題連我都唔知道答案,唔通我嘅智慧比小朋友更差?其實我唔係好醒目,以前度橋做Show要籌備一段長時間,而且會度唔到橋,遇到呢種情形,我唔會輕易放棄,會逼自己想到為止。我覺得度橋過程好似練武,想打好一套拳要經過不斷練習,亦好似音樂,打唔到嗰個Beat就重複去練,只不過我練習的是思想過程,當你不斷將材料左駁右駁時,突然會將兩樣嘢接通,嗰種成功感好似係天賜。」 

棟篤笑唔出 不如去瞓街

自從張達明參與「棟篤笑」的演出之後,人氣急升,不論電視、電影都找他演出;相反,黃子華似在原地踏步,是不是他欠缺觀眾緣?

「達明人際關係好,有好多演出機會。至於我,可能係性格問題,以前試過有搞笑節目搵我做訪問,但到正式時竟要求我做『棟篤笑』,冇準備叫我點樣做?我對自己要求好高,冇信心做好寧願放棄機會。我知自己嘅弱點係人際關係,朋友唔算多,喜歡就喜歡,討厭就討厭,好似《聖經》所講:『與吵鬧的婦人同住,不如住在曠野』,黃子華就係『與不合理的人相處,不如去瞓街』嘅人,自問唔係世界仔,唔合理嘅事,我嘅反應係避開,無謂辛苦自己,就算對事業有阻滯都唔想妥協。」

後記

兩位搞笑能手在性格上有好大分歧,表面健談的黃子華屬於慢熱型,反而外表戇直的張達明卻經常做出古靈精怪的動作,話題滔滔不絕;但是「棟篤笑」的才能令他們相遇、相交、相知。