黃子華做末代皇帝鬱到病

2012年4月18日 | 東方日報

以棟篤笑爆紅的黃子華一度暴瘦而曾傳患病,原來真正原因是他拼命減肥配合now海潤台現正熱播的內地劇《溥儀和他的五個女人》,更因過份投入角色而患抑鬱!

黃子華、內地演員蔣雯麗、秦海璐等主演的《溥儀和他的五個女人》,近日在now海潤台熱播。首次到內地拍劇的子華,一改搞笑作風,對角色異常認真,得悉要拍該劇後更搏命減肥,目的就是為了讓自己能完成史上最接近真正溥儀的演繹,子華說:「初初要接呢個角色好懷疑,嗰時我啱啱演完《男親女愛》,頭髮好長、人又肥,但導演堅持用我,我咪用幾個月減咗30磅囉!去到北京,記得當日我着住個造型去舖頭度買嘢,我走咗之後,個老闆同我個助手講:『嘩!成個溥儀咁呀!』」

子華暴瘦,除因配合《溥》劇造型,亦因給予自己過大壓力。拍畢《溥》劇後,他一度患上抑鬱症,當年他在《志雲飯局》訪問中對此直認不諱,談及患病原因,子華說:「就係因為太投入喇。」

場面真實感爆燈
雖然如此,《溥》劇還是帶給子華很多美好的回憶,尤其劇集裏所呈現的真實感,更讓他嘖嘖稱奇:「有場戲講我要入老人營接受勞改,我坐埋去都未拍,已經感覺好真,覺得自己好似歷史裏面跳出嚟嘅人!」

子華更笑指因拍劇,遇上真正的旗族人:「劇入面有個老婆婆,佢係真正嘅旗人,仲保持緊大清禮儀,對住爺爺嫲嫲好傳統。佢起初唔知我做咩,後來知我演溥儀,佢就好驚訝話:『你就係皇上?你(普通話)講成咁,點做?』好搞笑。」