頭先講到話呢，今日有周刊爆料，指收到無綫綜藝科總監余詠珊發出之「禁制令」，嚴禁同事邀請黃子華、歐錦棠同太太萬斯敏、黃家強、黃貫中、張敬軒、楊崢、張堅庭、林敏驄等亮相無綫綜藝節目。報道指林敏驄被封係因為剃無綫眼眉、拒接無綫世界盃但就幫《蘋果》做《依波Live》；至於陳嘉桓、楊崢同張堅庭等人「死因」，疑因為同樂易玲相熟有關。

咁黃子華同歐錦棠又點呢？報道指，喺封殺名單中，歐錦棠排第一，即係頭號，萬斯敏係二號，因為係歐錦棠太太嘛。黃子華排第三。

咪住先，歐錦棠同大台仲有約，只係佢呢期請緊假（都請咗年幾喇…），依家珊姐話封，咁疑似死敵兼戲劇組總監曾勵珍會唔會即刻開個劇俾佢呢……不過以CCTVB嘅維穩作風，只怕未必，皆因歐錦棠撐佔領。

該周刊都有訪問到歐錦棠，佢對於被余詠珊（疑似）落order封殺一事，就好淡然謂：「咁爆？佢（余詠珊）以前係我老闆，不過我同任何高層都唔friend，我係平民嚟咋。冇唔開心，兩個月前綜藝組同事都有搵我上節目，仲話有騷計，不過我唔得閒，推咗。」歐錦棠所指嘅余詠珊係佢「前老闆」，係指當年亞視年代，《今日睇真D》，其時余詠珊係節目主管，歐錦棠係主持之一。

最搞笑都係，黃子華歐錦棠撐佔領又點呢？但前者個廣州棟篤笑依然照開，歐錦棠依然可以自由往返內地，仲影埋相報平安。但竟然無綫一方面心繫祖國擁抱梁振英，同時竟然「偷步」先行封殺佢哋，點都講唔通喎…