梅艷芳玩Nike眉形象百變《男歌女唱》黃子華拿督造型大戰黃一飛

2001年11月24日 | 東方日報

梅艷芳和黃子華首次在新片《男歌女唱》中合作,鬥演技之餘,還來個百變形象大玩轉。兩人各出奇謀,造型百變之餘,且一浪接一浪,猶如扮嘢大賽,難得兩人又扮得出神入化,名副其實的扮嘢大王。

今次愈扮愈起勁
阿梅文藝片就拍得多,但扮嘢笑片,還要造型多多的,都算是近年少有,但阿梅的鬼馬造型絕對不賴,怕醜、斯文、騰雞Look出齊,最抵死的莫如挑戰鄭秀文的Nike眉造型,難得阿梅愈扮愈起勁,且不介意在銀幕前扮鬼扮馬,導演鄒凱光一於趁梅姐高興,多扮幾個趣怪造型。其中Nike眉造型的梅姐,還在戲中大唱泰版《都是你的錯》。

子華也不甘示弱,回敬阿梅來個爆炸頭、半撇鬚、拉丁歌王等造型之餘,還敢膽在歌后梅姐面前獻醜,也來高歌一曲,以拿督造型大戰「少林足球大師兄」黃一飛,合唱當年太極樂隊首本名曲《Crystal》。

自言唱歌壓力大
提到拍攝《男歌女唱》,與梅姐合作的滋味,形容自己是樂壇晚輩的黃子華聲震震的說:「我真係承受不少壓力㗎,因為喺戲中要我呢個只出過兩張唱片嘅新仔,教已經出過N咁多張唱片的梅姐唱歌,你話死唔死?雖然話演戲啫,始終都有壓力嘛!我仲要喺歌后面前獻唱,簡直係獻醜!扮嘢就話啫,梅姐,真係承讓!承讓!」