三大講男

1998年5月22日 | 壹週刊 | #428

曾經有男人跟我說,眼中的女人只有兩種,一種係「靚女」,一種係「八婆」。
其實女人眼中嘅男人又何嘗唔係只有兩種,一種係「靚仔」,一種係「八公」。
相信黃子華、張達明加吳鎮宇這三位仁兄,從女性角度去睇男人,用後者形容他們似乎最適合不過。
訪問中,有人遲大到仲顧住睇call機聽手提電話,有人訪問顧住食魚生,有人謬論多多,將記者問題愈拉愈遠,超越維多利亞港再橫跨太平洋,要問的問題問了,要答的答案消失於無影無踪。
三個女人一個墟,三個男人未必係嫖賭飲蕩吹,但肯定係粗口兼無厘頭一大堆,如果話印尼局勢混亂,倒不如說訪問亂過亂世佳人,無厘頭過十四歲品學兼優女生離奇墮樓死亡做港聞頭條。
三位老友,你放過我啦!

interview_19980522_001

一個字 — 賤 黃子華

為咗愛鍚自己身邊嘅伴侶,男人會花好多時間喺鏡面前修飾男人得天獨厚只此一家嘅鬍鬚,無論任何款式嘅鬚都可以代表男性本身一份特質,有男人認為無咗鬚同全身赤裸行街街無分別。

對於鬚根,可以講係完全代表男人,用鬚根帶出男人係最適合不過。

之但係鬚根係冇得討論。(但……但係……)但咩係,嗱!講男人就有大把話題。

(我……我係問你……)

你聽我講,自己身為男人,只係覺得做男人講來講去得個「賤」字,自己亦係一個不折不扣嘅賤人,因為每日打開報紙幾多賤男人欺凌弱小!我都係賤,不過我係一個坦白嘅賤男人,有邊個可以咁坦白話自己賤先,你話。(……)

再講,女人其實唔係好清楚男人,喺佢哋腦海中嘅男人往往係由張小嫻話佢知,由亦舒話佢知。但係邊夠由男人話佢哋知咁直接,感同身受吖!

舞台係我嘅生命,可能比鬚更重要。做騷唔同拍戲,拍戲係人都知,現今X戲之多有如天上繁星,冇乜所謂,但係舞台上一衰就大連最後機會都冇埋。大佬呀,舞台係我個機地嚟㗎,冇咗基地,我冇得撈㗎。

舞台係一個特別嘅arena(表演場地),上到舞台就係我嘅世界。記得有次同周比利(八十年代香港自由搏擊冠軍)傾開打拳,佢話上到擂台,擂台就係我嘅,你冇得亂打,你亂打嘅話我掟你落去,即是話嗰度係你專業嘅地方。

我上到舞台,唔係要掟人落去,但每次都要自己交足功課。

兩個字 — 子孫 張達明

自出娘胎子孫根與男人便切肉不離皮,一起成長,一起共度「快樂」與「方便」的每一刻,雖然子孫根存在只有兩大用途,「一時方便」與「一時之快」,縱使「快樂」過後會帶來「煩憂」,但春宵一刻之後依然是合作無間的好兄弟。遺憾的是這條契弟總會在你老死前提早跟你說拜拜,生存的兩大用途只剩其一,令曾經係血氣壯男嘅你浮現不少無奈。

講心嗰句,我有啲驚後繼無人,無人幫我傳宗接代。(你……)唔係唔係,我子孫根無事,我講緊我做緊嘅工作啫!你等我一陣,我攞啲魚生食先……

頭先講到邊話?係,我記得,哇!啲魚生幾肥喎!嗱!雖然橋冇話會有用盡嘅一日,但下次觀眾就會要求更多更好嘅嘢。

譬如成龍咁,每次拍戲都谷到咁行,Budget(成本)又咁勁,場場都去(盡)絕無悶位,行行行行完之後又點呢?之後有冇人再可以拍番成龍咁。又正如呢舖砌咗《鐵達尼號》驚為天人之後,跟住仲有咩船好講吖?

其實我都有諗過用子孫根做騷,呢樣嘢都通㗎,好多男人好粗鄙添,如果啱嘅話講埋粗口都得㗎,不過因為想多啲人欣賞,想家長帶埋啲仔仔女女入場,甚至乎掉轉,由啲仔女帶番爸爸媽媽嚟睇。

粗鄙啲地道啲都唔錯吖,起碼容易啲令人接受,但最頂籠都係會做到二B級,絕對唔會去到三級,我唔想嚇走啲有心捧場嘅人。

三個字 — 夠草根 吳鎮宇

社會上有人喜歡用草根階級來形容低下層人物,認為他們知識水平低,搵錢少,今日唔知明日事,但無根何來有草?冇窮人又點會有有錢人?草根都係人,雖然為數比較多,但享受到福利相反地少,可能從前嘅草根終日活在惶恐及憂慮之中,但今日嘅草根已經懂得自強。

你可能會覺得我哋三個好草根,但肯定三個之中最草根嗰個唔係我,係張達明,不過呢個係同家庭背景有關,所以冇得揀。

我唔算草根,不過對於草根都有一定理解。做咗咁多年戲,接觸過咁多層面嘅人,當中絕大部分係曾經係或者依家都仲係草根階級,不過草根唔係罪,所以冇特別歧視,久而久之自己都唔多唔少草根埋一份。Sorry!聽聽個電話先,喂!係……係……

係!Sorry繼續,亦因為咁,我自己近幾年愈嚟愈草根化,拍戲如是,搞笑如是,不過我覺得欣賞我嘅人就未必係草根。

最近,我喺創作意念方面極之澎湃,可以喺好短時間之內諗到好多橋去引人笑,不過引人笑之餘係會順便帶出好多嘢,唔係哇哇嘈笑完就算嗰隻,Sorry,我睇吓邊個Call我先……

係,繼續,我知道要令觀眾發笑唔難,但係笑得嚟要有深度,所以令到觀眾笑唔係我哋嘅目的,最好俾啲位佢哋諗吓嘢,如果唔係我哋幾條友使乜花咁多時間心機去度橋喎,除咗條褲扭兩吓籮柚咪算囉。

邊個話事

魚生好好食咩?Call機好好覆咩?電話好好傾咩?你講嘢好好聽咩?
兩個小時內,三大講男講了許多幾好笑的故事,亦說了許多無謂的話。
幾好笑故事見內文︰
無謂的話如下︰
「我個騷點點點……」
「觀眾睇完會點點點……」
「喂!你個訪問趕唔趕得切我出騷時出㗎!如果趕唔切,做嚟做乜呀?」
最後一句,真係動人肺腑入肉入心的無謂說話。
所以!
對不起!
趕唔切!

interview_19980522_002