今天，他恨到了。他真的紅了。

不過，人人都奇怪，紅了，為什麼不「食住上」，反而回到舞台貼錢搞《鬚根Show》。

「我追求的是工作上的興趣，並唔係話要紅幾耐！」黃子華說。

一套《男親女愛》，令劇中人個個豬籠入水，財源滾滾來。先有鄭裕玲打響頭炮，接樓盤拍超級市場廣告，連帶「老薑攝石人」蕭亮也被垂青，又拍廣告，又出唱片。唯獨是黃子華只接了一部電影《唔該借歪》便鳴金收兵，自斷米路。

自掏百萬搞《鬚根》

「廣告？有人搵嘅，但係傾唔啱。接電影？應該唔會，未來要專注做《鬚根Show》，六月份要開始和張達明、吳鎮宇度橋，今次演出四十場 Show，至少做幾個月，我邊有時間接其他嘢做？況且，無咩緊要得過做《鬚根》，《男親》都係靠口碑至受歡迎，我唔想往後《鬚根》做得衰。我過唔到自己嗰關。」

現實香港中，人人「我為錢狂」，但黃子華卻反其道而行，甘願出錢出力。聽聞他做《鬚根Show》，八百萬製作費，他和張達明、吳鎮宇各自掏腰包八十萬元出來。

「點止呢個數目呀？香港做舞台劇就係咁慘，做唔夠二、三十場，回唔到本，租舞台返嚟演出又貴，每場最少花幾萬元。」

「點樣做？我有信心做得好囉，一個演員，無論拍劇、拍電影都係 teamwork，但做騷可以自己話晒事，碰啱達明和鎮宇有一定創作力，有火花，點解唔做好啲！」

「我好愛嘟嘟」

「《男親女愛》添食，唔會囉！等觀眾留下一個美好回憶咪算囉！」

尚有三星期，《男》劇便煞科，子華每天倒數時間，對劇中相處五個多月的演員鄭裕玲、苑瓊丹和蔣志光等等，內心難捨難離。

提到嘟嘟，子華情不自禁地說：「某程度上，我幾愛嘟嘟㗎！她思想不算複雜，但要求高，係一個好好嘅演員，我對她嗰種好感，無辦法用言語表達出來，是那種人生得一知己，死而無憾嘅感覺。跟她做對手，有火花，她的口味和 sense 跟我好配合，跟住嘟嘟一齊拍嘢，好有滿足感，或者大家都係處女座啩。不過，處女座的女人比男人更加撬口。」

子華自嘲是處女座，碰巧嘟嘟、苑瓊丹和導演也是處女座，彼此性格特質同樣是緊張和要求高。

「我哋好鬼夾，連蔣志光都話，遇着你哋班處女座認真難頂。」

「你知嘛？佢哋好照顧我，知我有病（感冒）又無乜點瞓，中午吃飯會勸我瞓多陣，唔好出去食晏，回來時買咗個芙蓉蛋飯畀我，呢種關心令我好感動！」

一夜成名着數多

此劇除了令他贏得友情，更大得益是被封天王，坊間叫他做「余天王」。

「嘻，最初都唔知我咁紅。叫天王喎，係啲朋友見我啲新聞登全版，又話再創高收視我至知，但自己諗又唔知係咪？我一星期開工七日，早八晚七，有時收十點，幾個月來日日不停開工，邊有時間諗自己紅唔紅呀？」

「有次在街邊拍一場買臭豆腐外景，有班學生仔叫我：『余天王呀！』聽到我自己都諗一諗，居然無人叫我黃子華，見到我嘅 fans 多數叫我余樂天或者小強。」

「劇中小強的構思？唔係我諗㗎，係編劇和監製度出嚟，我驚曱甴㗎，呢樣嘢係要克服，你驚我重驚，但諗唔到人生就係咁奇妙，最初同編劇講做幾集你哋好將佢（小強）消失，點知佢會咁受歡迎，啲人喺街見到我直情叫我小強，又問我：有無帶佢（小強）出嚟呀！重要去到邊度，啲人都係咁嘅反應。」被坊間接受，一夜成名，子華笑言着數多多，例如搭的士司機免收零頭，fans 送禮物等等，但仍不及親身體驗被寵愛的回報。」

「有次我搭的士回家，一坐上車，司機即刻打手提畀朋友話：『喂！我見到余樂天呀！明日要去買三T啦！』接觸到人哋對你嘅友善，係一種無形的鼓勵！」

由九○年開個人騷《棟篤笑》，子華為的純是個人表演欲，紅？他說曾經在腦海中幻想過。

「我在娛樂圈十年有餘，睇見身邊可以紅嘅人無幾多個㗎，幾年都未必有一個，人生要經歷不同層次，我好想知道紅呢種滋味係點？依家我知啦！但未有時間消化，暫時只可收埋落袋，慢慢拿出嚟回味。」

「紅？對我嚟講冇壓力，重點唔係話我要紅幾耐，我只求繼續發掘在工作上的興趣，並唔係我要紅幾耐！」

黃子華由始至終都是一樣，仍然是「性格」巨星。