黃子華力撐老友羅金榮翻身

2002年5月14日 | TVB 周刊 | #260

平時的黃子華總給人嬉皮笑臉,冇厘正經的感覺,但原來他為了兄弟,可以赴湯蹈火,跪地求傳媒,甚至在街上「做媒」!這位令子華兩脅插刀的兄弟,並非小強,而是羅金榮!

榮:羅金榮  華:黃子華

識英雄重英雄

在《一觸即發》的首個記者會上,為了推介新唱片,子華竟屈膝懇求傳媒幫手,他如此落力宣傳,似乎有點 hard sell,但 sell 碟的背後,卻隱藏着一個包含義氣、奮鬥、有血有淚的故事。

原來這張唱片並非屬於子華自己,而是他的好友羅金榮的作品。

羅金榮(Wing)是誰?如果閣下不是太善忘的話,必定會記得樂壇曾經有一隊叫「幕後玩家」的樂隊,羅金榮就是這個組合的主音歌手了!

子華跟 Wing 確實很有緣,大約在十年前,子華為港台主持一個電台節目時,就曾經訪問過參加歌唱比賽獲得冠軍的 Wing,由於只是閒聊幾句的訪問,所以當時子華對 Wing 的印象不太深刻。

直至五年前,子華因拍電影,而跟 Wing 再次相遇,這次碰頭真是不得了!因為子華發現了 Wing 的音樂才華,而 Wing 亦一直欣賞子華的口才,識英雄重英雄下,友誼就此展開了!

叻在把口

華:「我對朋友好揀擇㗎,最初交阿 Wing 呢個朋友,都係因為佢有才華。係知嗎?佢唱譚詠麟嘅歌,有100%似,唱張國榮,有100%似,連唱林子祥都有80%似!佢唱歌嘅功力非常深厚,簡直係揮灑自如,我未見過一個歌手可以好似佢嘅音域咁廣㗎!」

榮:「我未識子華之前,已經覺得呢個人把口好犀利,識咗佢之後,俾佢改變咗好多,思考方式唔同咗,諗嘢都闊咗。可以咁講,音樂上令我改變嘅係B哥哥(鐘鎮濤),而思想上令我改變嘅就係子華!」

幕後玩家於九六年解散,當時的 Wing,只懂得用把口唱歌,音樂知識實在有限,但幸好他得到一位高人指點,改變了他的一生,這個人就是B哥哥了!

Wing 在B哥哥的工作室工仍一年多,由彈結他到製作一張唱片,他都學懂了,這都是多得B哥哥的啟蒙,之後 Wing 一直從事創作及監製唱片的工作,曾為林心如、馬浚偉及鐘鎮濤擔任唱片監製,亦先後為子華作過《藍天》及《不要怕》等曲。

兩壇血肉史

華:「坦白講,我自己出碟嘅時候,都唔會跪啦!點解我會為咗 Wing 咁樣做?有啲公子閒閒哋攞十萬八萬出嚟出碟,但 Wing 係零㗎!佢只係攞條命嚟博,佢係音樂人,覺得自己有使命去為樂壇做一啲嘢,呢個簡直係樂壇血淚史!其實我都曾經有過娛樂圈血淚史,但而家好彩,有人肯俾機會我,不過就冇人俾機會 Wing,咁我咪幫吓佢囉!」

榮:「《英雄》係我首張個人 EP,我足足花咗兩年時間製作,製作費約十萬,作曲、作詞、編曲、監製、主唱,都係一腳踢,我仲專登學打鼓、吹口琴等樂器嚟配樂添!我試過幾次攞住支結他喺赤柱同旺角街頭獻唱作宣傳,反應都唔錯,仲有不少人即場同我買碟,至於每張唱片賣幾多錢?我冇定價㗎!總之隨緣樂助,每次都賣出數十隻。」

Wing 不介意在街頭獻唱,反而覺得唱 live 十分過癮,子華亦專誠到旺角捧他的場,還臨時「做媒」添!

華:「嗰陣我好紅㗎,所以唔敢現身,只好偷偷咁企喺度扮觀眾,但當我帶頭行近一步時,旁邊嘅人又會跟住行前㗎喎!呢啲就係人嘅心態。」

雖然 Wing 嘅唱片銷量嘗未知道,但可以肯定的是,他這次出碟行動十分成功,因為可以確實肯定有一個義氣兄弟囉!