黃子華越嚟越「賤」

2000年 | Monday | #032

喺無線電視劇《男親女愛》中,黃子華飾演余樂天,角色性格上最大嘅特點係佢夠賤,所以子華成日都要當自己係個真正嘅賤人,重要係賤到貼地嗰隻添,唔係咁套劇邊會好睇㗎!

我係男主角

《男親女愛》暫時仲未落實會拍到幾多集,但子華就保證呢個劇100集冇走雞嘞,「若果套劇咁快完我咪蝕哂底?我之前拍《宋世傑II》都係為咗今日咋!我要話俾人聽我黃子華係做得男主角㗎!哈,哈!」

「講到尾,能夠做得成男主角都要多得無線曾勵珍同埋導演、監製佢哋,試諗吓一個未做過主角嘅人,一做主角就演成百集咁多,對班老闆嚟講係件好冒險嘅事嚟㗎,而家就證明佢哋冒呢個險,冒得非常之好,若果佢哋一早搵我做男主角就更加好。」

除咗男主角出色外,女主角都好重要,子華加鄭裕玲就俾子華喻為「無敵合拍」,「做咗咁多年,最夾嘅拍檔就係DoDo,我哋嘅sense好夾,好多嘢都夾,主要係DoDo肯夾,因為同DoDo拍檔,原本係可以好唔夾㗎,人哋話哂係阿姐嚟喎,要同你黃子華夾?」

「事實係好彩,DoDo冇阿姐款不特止,仲非常合作添,大家擦出好多火花,都算係一個幾完美嘅組合,如果唔係咁嘅配搭,相信套劇都做唔到咁長篇。」

要演好余樂天呢個角色,子華確係花咗唔少心血,首先喺劇本方面啦,經過監製講完角色人物性格後,子華就要加番自己嘅思想落去,令到個角色變成一個有血有肉嘅人。

我係唱作人

遲啲《男親女愛》會出隻sound track,子華負責唱碟內嘅歌曲,其中仲會有首〈小強之歌〉,係子華特別為小強而作㗎,現時隻sound track仲未完成,仲需要多啲時間去創作。

「依家淨係拍劇都用去我大部份時間,好似跑緊馬拉松咁,睇吓自己跑得幾耐咋!我唔鐘意工作得太密,唔想成日有返工嘅感覺,我一有時間就會去聽吓歌搵吓靈感,我又成日同自己做心理輔導,話俾自己聽呢個世界好美麗,咁我就會對呢個世界充滿期望,咁就可以繼續做嘢。」

上年子華填詞兼主唱嘅〈關老三〉,喺北美電台得到播放率新人獎金獎,對子華嚟講實在唔係太開心,事關得獎就即係代表已成過去吖嘛,況且子華入咗行咁多年,仲攞新人獎就確係核突咗啲。

我係有感情生活

感情生活對子華嚟講已經唔係私事,只係佢覺得觀眾知太多佢嘅私生活,會影響咗觀眾睇佢嘅演出,「好似睇戲咁,你明知個男主角係基佬,睇住佢同個女主角談情說愛,觀眾就會覺得個演員唔襯個角色㗎。所以我寧願觀眾知我嘅私生活少啲,咁就容易投入到我演嘅角色裏面嘞,我只能同大家講我係有感情生活。」

平日空閒時,子華唔會用哂啲時間去拍拖,佢鐘意間中俾自己漫無目的咁「攤抖」諗吓嘢,要佢個腦完全休息係件好難嘅事,就算係瞓覺佢都感覺到個腦天旋地轉緊,就係佢個腦唔停得,才令到佢創作到咁多嘢嘞。

子華對愛情同友情都睇得相當重,佢認為感情世界唔應該只得一個人,佢認為同朋友一齊去disco就係最佳嘅relax方法,但係大家唔好諗住喺rave party度見到佢喎,因為佢覺得去rave party好冇安全感,「我會諗rave rave吓火燭咁點呀?可以點樣逃生呀?而且去rave party又要排隊入場喎,排完之後話冇哂飛咁點呀?我承受唔到呢個打擊㗎,同朋友落吓disco咪好囉,舒服啲又安全啲,睇吓人哋跳舞都夠開心啦!」

我係個乜嘢人

好多人會覺得子華份人幾「囂」㗎,會喺不知不覺間去寸人嗰種嚟㗎,但其實佢係冇惡意㗎!「有時我講嘢傳達個訊息俾人,可能係人哋收錯訊息,至會覺得我講嘅說話寸啫,呢啲都係誤會嚟,又可能我成日演啲賤人角色,啲人睇得太投入咪有咁嘅感覺囉,好平常啫,呢啲嘢我接受㗎。」

子華除咗做余樂天呢個賤角色做得開心外,佢仲想撚吓雀做二世祖添,佢想享受吓過二世祖嘅生活,「如果TVB可以開個類似《朱門怨》嘅劇,又肯俾我演二世祖嘅角色,我就會非常開心喇!我最鐘意就係啲衰衰哋嘅角色。」

其實子華係個好有內涵,有思想兼有才華嘅人嚟㗎,讀書嘅時候佢主修哲學,於是就俾佢悟出好多與別不同嘅嘢,然後就搞咗咁多輯《棟篤笑》,到依家佢嘅《棟篤笑》VCD銷量仍然高企,收花紅不知收得幾開心。喺年尾佢又會搞一個show,個show會講啲乜?佢梗係賣個關子先啦,fans們就要密切留意喇!

後記

憑一個飯盒,就睇得出子華係個好認真同專業嘅藝人,因為佢嚟到做專訪時,叫咗個飯盒做午餐,佢睇住一個熱辣辣又好味嘅飯盒放喺佢面前,但係無論幾肚餓,佢都係堅持要完成成個訪問至食個飯盒,到完成整篇訪問後,一個熱辣辣嘅飯盒已經變得冷冰冰,實在令我覺得十分唔好意思,早知佢咁認真就唔咁早叫飯俾佢食啦,希望下次可以請佢食番個熱辣辣嘅飯盒啦!