黃子華 一淚換一淚

2001年11月14日 | 東周刊 | #471

舞台劇《男親女愛》之後,久未見黃子華,原來他北上拍電視劇《溥儀》。提起事業,他眉飛色舞,但提到愛情,居然笑中有淚,哭泣,本來就不是女人的專利!

佢哋話子華減肥(為咗飾演溥儀),一瘦瘦咗二十五磅。

佢哋話,你見到子華實一跳,因為佢依家似足一個道友。

林:林冰  黃:黃子華

黃:唔好意思,遲咗添。

林:唔緊要,嘩!瘦咗咁多嘅?聽講你為咗飾演溥儀,大力減肥噃。

黃:係呀,一個月減咗二十五磅。之前一百五十五,依家一百三十。

林:會唔會對鏡自顧,會覺得自己有可憐呀?睇黎肚皮黐背脊噃。

黃:瘦咗又幾好。覺得自己薄薄哋,有啲輕盈,第時拍完戲,我都會keep番。肥番少少咁啦。

林:真係好奇,大陸咁多人才,演技出眾者俯拾皆是,點會睇中你呢個香港仔呀?

黃:係呀,但我鍾意個劇本,好想演。又同廣州搞製作嘅朋友傾過,問:『啲觀眾對溥儀會唔會有興趣?佢哋話有,當然有,當然有,近代史中,溥儀係最吸引人嘛。』我話:『既然係咁,點解你哋唔拍?』佢話『冇錢,拍溥儀場面大,人物多,成本高。』我一聽,梗接啦。
你知嘛,因為我,三十集嘅電視劇收咗音之外,全部要重新配音。

林:全部重新配音?咁,豈不是又使多一大筆。咁講,佢真係好倚重你。乜佢哋覺得你似溥儀咩?

黃:佢睇過我嘅《男親女愛》,亦睇過我嘅棟篤笑。導演話一個演員,單獨企喺台上,靠把口講,指手劃腳可以懾住全場,淨係呢份能耐,已說明演員本身有一家嘅魔力喎。
佢叫我減肥,話瘦咗就似溥儀。

interview_20011114_eastweek_001

減肥做溥儀

林:有冇食減肥藥?

黃:冇。食少啲,主要係做運動,每日運動超過一小時。

林:今次係返黎宣傳你同梅艷芳嗰套《男歌女唱》呀?

黃:係呀,我喺長春拍咗一個多月,溥儀晚年喺東北做傀儡皇帝嗰啲戲拍完,跟住去北京,大概再拍三個月。未來嘅三個月,我唔返香港嘞。

interview_20011114_eastweek_002

在港已無家

林:聽講你喺香港已無家,今次你返黎住酒店,中國星俾錢呀?

黃:係啩,呢間套房,係啩?應該係中國星俾錢,咁闊佬?哦,聽講佢哋睇好《男歌女唱》。

林:子華,你嘅演技點呀? 咁多年來,我哋都睇得你唔少,只覺得你平平無奇。

黃:一個冇乜人識嘅人,點都冇嗰啲有知名度嘅人演來令人共鳴!我演棟篤笑,始終係小眾,識嘅人少。

林:咁,我哋未係幾識周星馳之前,喺電視台都已覺得呢個靚仔好有戲。

黃:我同你講一樣野吖!我未紅之時,都有fans嘅。某日,一個fans寄咗封信俾我,話我咁樣都唔紅,好唔抵,話佢想介紹一個人俾我識!

interview_20011114_eastweek_003

蕭若元教路

林:邊個?

黃:蕭若元。咁我咪去見蕭若元囉。蕭若元話我演技冇乜問題,唯一嘅問題係「冷」,如果我改為「熱」一啲,「熱」番啲,我就會掂。

林:於是你聽從呢位高人嘅指點,「熱」番啲,《男親女愛》開始,一試即靈?

黃:係呀,我跟住就係拍《男親女愛》,我試下熱啲,咁就掂,其實,我本人係一個內歛嘅人,唔鍾意搶,以為憑實力可以上位。

林:當你成為大紅星之後,你就可以內歛,新人內歛就死梗啦。子華,有人叫我問你,話:『你又唔係靚仔,點解咁多緋聞?』我梗係唔同意啦……

黃:(超快打斷)你啱呀,我真係冇緋聞,嗰啲緋聞全部係假。

interview_20011114_eastweek_004

林:我係話: 緋聞並非靚仔專利,有才華有能力有錢嘅男士一樣吸引異性。

黃:我就係冇,得嗰一個、兩個。

林:同居幾年,話分就分,我睇你哋真係瀟灑,不知幾羡慕你份灑脫。

黃:你錯。我係好傷心,好傷心,傷心到不知喊咗幾多勻。離開香港係好嘅,咁多年,好忙,冇時間冷靜落嚟反省下自己。

林:因乜事分手?

黃:性格不合。唔好問咯,傷心事都唔想講。

林:你係唔咪唔識點同女性相處呀?

黃:可能唔識得點愛人啦。

interview_20011114_eastweek_005

鄭裕玲感觸

林:講起你同嘟嘟嗰筆……嗰一日,喺電視上,見到嘟嘟靠喺你個膊頭上喊,原因係:佢得咗個女主角獎,你得唔到男主角獎,佢就趴喺你膊頭上喊。當時,我有一個諗法,以我經驗,哭非為獎,而另有原因。
以我對嘟嘟嘅認識,一個電視台嘅獎,不致於令佢咁感觸,似是男女感情問題夾纏其中,係唔係冇乜錯摸咗,難返轉頭之類呀?

黃:嘟嘟佢覺得我係一個好人,佢好了解我。覺得一個咁好嘅人點解想得一樣野都咁艱難,佢咪感觸囉。

林:係人都知一個電視台咁嘅獎係乜一回事啦。

黃:《男親女愛》,講明男親女愛,點解一個有獎一個冇丫?唔合理呀。

林:唔係噃,冇女演員好過佢,佢咪得獎囉,有男演員好過你,你咪落第囉,好顯淺啫!
好嘞,唔討論呢啲嘞,你對過去一個多月喺《溥儀》嘅表現滿意嗎?

黃:好滿意。依家我好容易入戲,愈來愈入戲,頭頭有啲擔心,第二日,導演已經話:『估唔到你咁快已有神韻。』

林:咁你咪好開心。

黃:係呀。大陸嘅演員係好好戲,同佢哋做對手, 好易入戲。你知嘛,做我媽媽嗰個女演員,一開機,眼淚巴巴咁。好似開水喉咁流,我依家都做得到,話喊就巴巴咁開水喉。

林:乜成日喊嘅咩?

黃:係呀,聽皇后講,到咗晚年,佢都成日喊。喺長替一個多月,我演佢晚年,喊都喊咗十幾日,個人好沉鬱。

林:如果你又喺全中國一炮而紅,演戲會成你嘅終身職業呀?

黃:唔,肯定唔會到老都仲拍電視劇。

林:點解呀? 做一個「男鄧碧雲」都唔錯,到老都演操控全劇嘅角色。

黃:你知,拍溥儀,我哋一日拍幾小時嘛? 十七小時,嘩!幾辛苦呀!如果喺香港,仲慘,除咗吃飯入廁,全部時間開工。都係拍電影好。你知嗎?好多朋友話我傻,趁依家拍電影咁好價,應該多啲拍電影,你喺呢個時候北上,錢又唔係多,好蠢啫。

林:拍電視少過電影呀?

黃:對我就係,自從《男親女愛》,我片酬升咗好多倍,多人搵我,我都係揀嚟拍。淨係拍咗兩部,一部自演自編自導嘅,一部張保聲嘅,同埋《男歌女唱》。
拍溥儀係我想接,想拍就唔敢開高價,打聽好國內演員嘅高價中價同低價,揀咗中間價。

林:我覺得佢哋揀你都「別具慧眼」,國內大把好演員。

interview_20011114_eastweek_007

後記

覺得子華變咗。以前佢比較冷漠,依家佢在生活中亦經常「飾演」各種不同角色,接受訪問時佢就「飾演」一個紅星,雖然對訪問作出配合,擺出各種甫士,對鏡梳理頭髮,少不免有遲到。花了足足十六年時間,大光燈終於對準佢,亦不可以話不虛此生。

interview_20011114_eastweek_006