子華應邀出席我們香港大學利瑪竇宿舍的高桌晚宴，用餐前他在台上播放了一段美國棟篤笑的錄音帶，錄音帶中雖然傳來陣陣笑聲，但現場的同學卻毫無反應。子華當場註釋︰我久聞HKU是最高等學府，英語水準好高。

這個笑話令到同學很不快，大家以沉默作反抗，這種抗議方式比噓聲更恐怖。

七年後重提此事，子華說︰「我好唔開心，你哋好冇禮貌。」 自此之後，子華再沒有出席類似的活動。

今日，想對子華說句多謝。因為你令人難堪的笑話，叫我哋認識自己嘅傲慢與愚昧。以前係，而家都係。

東︰做咗咁耐棟篤笑，究竟你最想講乜？

黃︰我最終最想講嘅話題係人生的意義。每一日如何活？跟住去邊度？我以前冇真正咁講過呢個話題，希望呢次《拾下拾下拾年棟篤笑》能夠講到。

東︰呢十年你嘅人生有乜轉變？

黃︰好勝心少咗，以前我以勝者為先作判斷，我要贏，要做乜乜，要做物物。又或者成日怕自己做唔到乜嘢。其實，咁諗真係好傻，呢個世界Anything is possible and everything is impossible。最重要係你真係要做啲乜嘢，其他一切原來都不在你估計掌握之列。

近呢幾年我有時間不多的感覺，覺得係時候要做啲嘢，唔可以再浪費時間。又唔係話真係要做啲嘢出嚟，而係可能有半年乜都唔好做，總之要搵出如何活好每一日嘅方法。

東︰棟篤笑係咪最能表達你自己理想嘅媒界？

黃︰用咩方法都唔緊要，只要滿足到我嘅創作慾就得。棟篤笑嘅好處係︰我身無分文都可以做。做唔到大場，做細場，一萬人、五千、五百都可以做，去間bar都可以做，個問題係你仲要出去搵嘢做啫。

冇話out唔out

東︰有冇擔心過自己有一日會好out，再冇創作能力？

黃︰out咪諗啲out嘅嘢囉，專諗out嘅，in啲嘅就唔好諗，咁都係一種創作嚟㗎。

其實out只係對市場嘅指標，除非你條命玩完你就真係out喇，你一日唔死，你都要食飯、交租，做人冇得out。out係市場話你知唔再歡迎你，你呢隻嘢搵唔到錢。問題係你能唔能夠覺得自己嘅生活賦予你夠嘅意義，以致你可創作。好似我嗰次喺油麻地（見到有人）盤咗個好高嘅頭，十足幾十年前嘅女人，你覺得佢out啫，但佢都唔知活得幾實在。我哋面對係market之嘛，如果冇market，呢個世界會多姿多采好多。

有人話日本依家只興呢種衫，我去日本不知幾多style，有軍look、英國look、rave look、呢派唔可以話嗰派out，有人到死嗰日都唔會著你話興嗰啲衫。所以一切係視乎社會嘅空間。

黃︰當我入電視時，好得人驚，問我︰你捱唔捱得住呀子華？兩個意思︰1. 體力上；2. 接唔接受得到咁流水作業呀？佢哋以為我拍慣電影好巴閉，殊不知我係拍過好多比電視更差嘅電影，我不知幾ready。大家都不知道依家電影幾坎坷，以前就話拍電視辛苦，訓練到你拍電影，依家真係調番轉。

東︰依家拍戲係咪淨係為錢？

黃︰我一直嘅心願係做演員，第一份工作係喺香港話劇團做演員，電影有得我做我點會唔做？我爭取任何機會去做，希望有一日我可以做到一個角色有人認同，以玫我有機會喺啲更好質素嘅電影出現。

依家當然已經唔係咁諗。基本上我已經放棄，放棄「我會有運行」呢個諗法，我唔會覺得拍到啲特別有質素嘅，我唔會覺得嗰啲人會對我感興趣。我唔放棄嘅只有︰希望我可以導演一部。

做導演係一個遊戲

黃︰拍電影就好似去歐洲旅行，一世人點都要去一次。去完返嚟，你可能會話「唓，啲嘢咁貴！」咁係另一回事，但點都要去遊一次埠，係應該去經歷一下嘅。對我而言，做導演係一個遊戲。

東︰喺娛樂圈咁耐，仲有冇乜嘢你會執著？

黃︰質素。我最近一次發脾氣都係因為呢樣嘢。做嘢點可以咁㗎？我最初返香港，會講哥普拉嘅戲，入咗個圈啲人會話「你都唔明，哥普拉一個鏡頭等於我哋拍一套戲」，慢慢就會有太多諒解，「呢套戲都唔錯呀，嗱，唔好講其他，呢場戲真係抵死，淨係香港人肉侏羅紀先可以做到。」

因為諒解，就唔知自己要求啲乜，然後你會冇咗夢想。

結果，我拍戲咁耐，差唔多次次都係諗︰「點樣可以將自己嘅角色，救好佢呢？」係「救」呀！唔好諗套戲嘞，起碼救咗自己個角色先，做出嚟好好睇睇，後來自己都救唔到自己。

好！再嚟一次！

說到這裡，大家都有難言的悲哀。此時，子華送上一則動故事。

「我記得拍《人間色相》一場戲，喺天台拍嘅，拍完就落下面打燈，但當時我同導演同攝影講，我覺得自己做得唔係幾好，可唔可以再嚟一次？『好，演員有要求，好再嚟一次。拍完，我又同導演講，可唔可以再嚟多次呀？『好，演員有要求，我哋再一次。』呢一剎那，真係美好。」

導演係張志成，攝影係關柏煊。

「我要多謝呢兩個人，送俾我電影生涯裡最美麗嘅一個片段。」