《新時代廣場特約：一觸即發》播映後，其吞噬參賽者的「窿窿」、眾名人、藝員邊驚邊玩、女藝員淚灑當場、主持人黃子華的表現等，均成為一時惹人談論的話題，打頭炮的攻略版《一觸即發之洞悉先機》平均收視已經有34點，有好的開頭就是成功的一半，確是值得「你的節目主持人」黃子華開香檳慶祝。好嘢難免招人妒忌，故贏了收視的同時，亦引起一些負面評論，當有人說「造馬」，亦有人說淘汰方法殘忍時，子華決要為該節目作出大平反。

【人窿合一】

《一觸即發》頭威頭勢，確是值得恭喜，收視反映節目非常受歡迎，但主持人子華竟說自己的任務不是挑戰收視最高點。「我的首要任務是發揮『窿窿』的最高潛能，因為參加者覺得跌落窿度係一件好刺激嘅事，而觀眾睇嘅時候又感到刺激、緊張。我希望可以做到人窿合一，我就等於個窿窿，正如當日我同小強一樣，唔係獨立個體，而係合體。」除了做到子華與「窿窿」合一之外，作為主持人的最大希望是觀眾玩或睇都咁開心，就好像在「攻略版」出街後的一天，一位小朋友竟然可以對子華講出：「話之你叻過李小龍，但你鬥唔過我個窿」，這令他非常高興。

口中雖說最重要是觀眾開心，發揮「《一觸即發》為你減壓」精神，但他對收視亦有少少期望。「當然希望收視唔好差，只要不比同時段的節目遜色，已是一個交代。」他對節目的收視期望是多少？「我真係無諗過喎！講真我覺得30幾點並唔係太高，過去《男親女愛》最高去到50點，要突破這個紀錄都幾難，倒不如將諗收視有幾多的時間用嚟諗點令自己進步。」

【見招拆招】

子華做電視劇、電影和棟篤笑做得多，今次獨挑大樑做主持，感覺又如何？「比做戲更辛苦，因為要求我要有高度集中及注意力，有許多預料不到的事情都會發生，例如大部分參賽者第一個窿已玩完，咁咪有好多時間剩囉！咁點算呢？除咗同參賽者傾偈，都要諗遊戲同佢哋玩吓，仲要睇吓自己可唔可以適當地執生。」

至於會不會在主持節目前諗定一些執生的方法，自言喜愛即興的子華說不會。「下下諗太多反而阻礙自己嘅現場發揮，現場突發嘢並唔係自己預計得到，不如放棄諗所有的可能性，順其自然，融入當時情況再諗拆招方法，好似一個18歲女仔或肥哥哥驚到喊嘅情況同應付方法都唔同，對着一個多口嘅或沉靜嘅參賽者的反應都唔一樣啦！」

【做主持不是為接廣告】

鄭裕玲主持《一筆OUT消》及鄭丹瑞主持《智在必得》後均得到廣告商垂青，接拍廣告，豬籠入水，子華有沒有寄望主持《一觸即發》後同樣賺到盤滿砵滿？「我未做主持嘅時候都已經傾緊啦！而且係一直都有廣告斟洽緊。況且我為做節目而做節目，並唔係為接廣告而做節目，就算接唔到廣告，我都好心安理得，因為我只想話俾人聽我可以主持到一個遊戲節目。」