訪問可以一撻即着，只要你好彩，被訪者不大被人為意的一面，你看得出、問得出。

「你是否常常失眠？」 那天的第一個問題。

「我勁失眠！你點會知？我尋晚5點己經想瞓，到今日12點都瞓唔着！」

為乜？

「主要係諗仙姐喺舞台劇中點樣出場好。」

失眠是病，但能失眠19小時，某程度上都是一種奢侈。你跟我這些「打工一族」，頂多失眠5、6小時，天亮了，還不是行屍走肉搭地鐵上班去，開展暗無天日的一天。

「好多事可以令我瞓唔着。唔係我去搵嘢諗，係佢哋都嚟搵我，就好似有個人不停播錄影帶俾我睇，但我冇得制止佢。尋晚有好多事情穿插，經過我嘅腦海。」

如果余樂天真的很爆笑，如果舞台上的黃子華真的很「才華橫溢」，你要知道，你的笑聲都是用他每晚死去的無數腦細胞換回來。

如果你有一點同情心，一點好奇心，可以跟我一起去悼念他昨夜剛犧牲的那群可憐腦細胞。

跌下來

現在是下午5點，昨晚睡不好，今天不如試試早點睡，有充足睡眠，明天《東週刊》的訪問便可容光煥發地拍照。

不知明天那個記者會問我甚麼問題？如果他問：「子華你覺唔覺得依家自己好 紅？」便證明我一定紅極有限，正如冇人會問劉德華覺唔覺得現在自己好紅， 最多只會問：「你怕唔怕跌落嚟？」希望那記者會這樣問我。

其實我覺得自己的高峰位已過了，而且「紅」不等於可以做些有趣的事情。有些人紅了，怕跌下來，於是成世要做些重複的事。我覺得更加重要的，是可否再做到些有趣、有價值的東西。

一個名

《男親女愛》只是一個意外的成功，所以其實我亦可以有個「意外的失敗」。好多年前有個圈中人話娛樂圈是「一將功成萬骨枯！」講得好欷歔！甚麼是成名？只不過是在地鐵車廂內，由我去望人，覺得別人古靈精怪，到別人望我，覺得我古靈精怪。

每個市民心目中都有個娛樂圈中人的List，但參與娛樂圈這個遊戲的人，一定比他們心目中那名單多很多很多。我只希望可以是他們名單上的一個名，記得我也做過些好的事情。

征服快樂

原來已經11點，唉！又瞓唔着。如果真是可以像余樂天般生活，那麼晚晚也不用失眠。他是個「一條線的人」，任何事情也可以一個取向到尾，自私但開心，「又如何」便一日，唔到你妒忌。但我偏偏就是一個「兩條線的人」。我的快樂度永遠都只是50：50，成日要睇羅素那本《如何征服快樂》，提醒自己要努力去征服開心，提醒自己要知足。

不過諗諗吓，我有時也是個「一條線的人」。當年入娛樂圈，我真係諗住會紅，唔係嚟趁吓墟，開心一場㗎！你話幾戇居！

現眼報

又記起當年參加那個「全能司儀大賽」，我那晚輸了，又是徹夜失眠。想了成晚，終於明白，輸是因為我去模仿一些當時叫做「紅」的司儀。別人的方法成功，你可以佩服他，但都只是別人的事，還是要搵自己的方法。雖然有自己的方法不表示會贏，但輸，都是輸自己！輸扮人，你話幾無聊！

其實我不是天生口齒伶俐的人，上次同冇見好耐、由細玩到大的朋友聚舊，他說我自小就是個嚴肅的人；今日的幽默感，基本上是一分天才，九分努力。

又令我記起當年真正第一次的棟篤笑，是我在港台做幕後時，老細葉潔馨叫我在一個「聽歌學英文歌唱比賽」之前講10分鐘笑話。我講了9分鐘都冇人笑，到最後一分鐘，先有三兩下掌聲，我好驚，即刻走。想起來都好笑。棟篤笑真是很「現眼報」的一樣東西，Buy唔Buy即刻知，冇得避！

笑匠

個鐘已經4點，我竟然仲咁亢奮，早知叫達明同我一齊度劇本啦！當年叫他幫手搞棟篤笑，也只是因為想自己的腦袋可以休息。見到他就開工，他走了就收工。今次做《男親女愛》舞台劇，負責成個創作，又搞到我個腦冇得收工。唉！不過算啦，今次真係可以滿足到我多年來想做導演的夢想。

如果聽日個記者問我係咪想做笑匠，我真係唔識答，因為我都唔知自己係咪想做笑匠。笑匠是要一輩子都奉獻給「笑」，要好專心，但我個人太花心，有好多不同角色想演；又唱歌，又想做導演，想多線發展。

成功

其實做人只要做到自己喜歡的事情，已經是成功。掂唔掂，Out唔Out，其實只是不同準則。好像作曲家扎里拉里，在莫扎特未出現之前，自覺自己作嘅歌好正。但當聽過莫扎特之後，覺得自己好唔掂，知道莫扎特才是天才，之後就好痛苦，心諗不如放棄音樂，或者殺咗莫扎特。其實只要佢唔好理人，你有你扎里拉里繼續好屎但有自己Enjoy嘅音樂，便已經算成功。

觀眾緣

點解仲未訓得着，都已經係晨早9點。唉！驀然回首，雖然今日嘅成就好多都係靠我雙手雙腳爬出嚟，但如果要計，真係有幾多人對我幾好。我第一次話喺香港搞棟篤笑，霑叔（黃霑）唔識我，知道有呢個傻仔，都專登約我去Grand Hyatt飲茶，俾本棟篤笑嘅書我睇；又好似陸明小姐（作家），每場嚟睇，日日專欄寫我，買飛買幾十張請人睇，日日推薦我。諗起都眼濕濕。

做人真係好奇妙。記得有次俾人指住話：「你覺唔覺得你好冇觀眾緣？」甚至被人叫過「票房毒藥」，大佬，我拍過幾多戲呀？到左而家，哈哈！一個咁冇觀眾緣嘅人居然俾人話有觀眾緣。真係好虛幻。

嘩！已經12點！依家呢個殘樣俾個記者見到，唔知會唔會俾佢寫衰。不過算啦。寫衰我，又如何呀！

後記：瀟灑

訪問前經理人叮囑了三千萬次不可談感情事。

於是，訪問的不少時間都在談失眠。

作為一個「專業」娛記，訪問尾聲，我仍打蛇隨棍上，懶輕鬆地問：

「咦？你常常失眠，在床上輾轉反側，不會令睡在你身邊的人睡不好嗎？」

「這個問題答不了你。」

失眠19小時後仍然非常清醒。

「你明唔明，真正關心我的人，都不會關心我這些問題。」說得語重心長。

至於昨夜子華為仙姐而死的腦細胞，就待入場觀眾的笑聲來追悼算了。

如果要形容現階段的自己，他說兩個字就夠：釋然。

「下次搞棟篤笑，我想講香港人的病。」

乜病？

「失眠是其中一種。」

驚唔驚有一日，你講笑話再冇人笑？

「依家學識，盡了力，自己開心，可以講得出：『衰咗？又～如何呀！』
幾瀟灑，香港人好多都講唔出這句話。」

真係幾瀟灑。

我今晚都要試試對住浴室鏡習練習練習。