挾《棟篤神探》餘威 奸仔子華反撲影圈

2004年8月8日 | 蘋果日報

《棟篤神探》中的莫探員黃子華,在無綫平步青雲,但在影壇卻連番失利,他自導自演的《一蚊雞保鑣》票房仆直,但他未曾放棄,更一改戲路再闖影壇,在新片《阿孖有難》中演大反派。

事業篇:影壇失利當交學費
現已四十三歲的黃子華,因一部處境劇《男親女愛》而人氣急升,近日無綫播映的《棟篤神探》,更奠定了他冷面笑匠的地位。

子華在無綫甚吃得開,但轉戰電影卻落得慘淡收場,無論是他自導自演的《一蚊雞保鑣》,還是與影后梅艷芳合演的《男歌女唱》,票房成績也叫人慘不忍睹。似乎子華應將時間投資在電視圈,總好過在電影行業蹉跎。

08ec9p3

我做反派,觀眾可能都係笑㗎咋!

大卡士唔一定收得

子華承認電影成績不及電視,但他卻未因為數字上的問題而就此罷休,他說:「電視睇收視,電影就睇票房,但係咪認輸呢?又係另一個問題,電影好講天時、地利、人和,好多大明星唔係套套戲都收得,冇一個一定得嘅大卡士,要睇成個製作。係咪觀眾唔捨得畀錢睇黃子華呢?但棟篤笑成幾百蚊一張飛,重貴過睇戲,啲觀眾又一樣買飛嚟睇噃!

「《一蚊雞保鑣》係我第一部自己執導嘅電影,我拍完之後先知道,拍一部喜劇原來唔可以乜都理,而且我做商業電影原來係冇耐性,呢次就當係一個學習過程。」

08ec9p6

郭羨妮與子華在《一蚊雞保鑣》中演情侶,票房成績慘不忍睹。

見好即收拒拍續集

電影上的連番失利,令子華往後選擇劇本時也份外小心,近日他已推掉兩部擔正做主角的電影,寧願為鄭伊健與蔡卓妍主演的《阿孖有難》客串做大反派,因子華認為今次做大反派發揮較大,他說:「相信觀眾都想睇吓做大反派嘅黃子華係點,可能到時我一出場,啲觀眾都係笑,但我唔會限制自己淨係做某一類型嘅角色。」

近日收視高企的《棟篤神探》中,子華認為除蔡少芬外,蔣志光和魏駿傑亦演得很出位,若將來有機會定會爭取跟二人合作,不過,若無綫開拍《棟》劇續集,子華表示不會接拍,他說:「見好就收,就好似當年我做《男親女愛》一樣,而且演員應該試多啲唔同嘅嘢。」

08ec9p7

揚言不拍《棟篤神探》續集的子華,大讚蔡少芬(右)演技出色。

不少演員埋怨拍電視劇過的是非人生活,但卻絕少聽聞子華在傳媒前呻過半句,他笑說:「我好佩服嗰啲演員,如果換咗係我嘅話,就一定死得!可能自己一世夠運,拍親劇啲通告都唔算太密,其實頂唔住可以休息㗎,我自己就有限額,頂多連續拍三日三夜,而且開劇嗰幾個月,我特登請個司機揸車。」

做老闆出碟話晒事

先後做過電視劇、電影及棟篤笑的子華,目前最大心願就是出唱片,但不是以他的個人名義出碟,而是他近日新組成的樂隊「哈痞」(Happy),子華說:「今次係我自己做老闆投資,我唔傾其他唱片公司係因為唔想到時我哋作好啲歌,唱片公司又話呢首唔得、嗰首要改,做老闆可以自己話晒事。」

08ec9p1

黃子華

感情篇:保護女友幾乎冇命
在幕前總是不解溫柔的黃子華,原來是相當細心體貼的男朋友,上周他為保護圈外女友免受狗仔隊追訪,不惜冒生命危險亡命飛車,幾乎三次墮進鬼門關。

拚命踩油衝燈

子華日前談及此事時仍有餘悸:「班狗仔隊係咁追住我哋,想知我哋住邊度,所以我搏命踩油衝紅燈,我一路踩油一路心諗『我今次做硬戴安娜(已故威爾斯王妃)』。」

子華表示,他亡命飛車時,差點與巴士及小巴撼個正着,有三次死裏逃生的經歷,令子華不禁抹一把汗,他說:「如果唔係女友喺隔籬,我一定揸得重狼,不過無論你點避都好,到最後一定輸梗。」

其實子華的女友已經曝光多次,為何子華仍如此避忌?他說:「其實我冇問題,我入得呢行就預咗俾人影,但女友唔想,因為佢係圈外人,有自己嘅生活空間,如果成日俾人影相見報,咁咪人人都認得佢,去到邊度都俾人眼望望?」

08ec9p4

黃子華

後記

有追看《棟篤神探》的觀眾,可能會留意到子華經常穿着一件大褸,當大家以為他為配合劇中的神探形象而穿,他卻自爆其實是懶換衫而已。他說:「過往開工換衫換到暈,所以我今次每五集先換一件,加上角色所需,經常要袋住好多嘢喺身,所以我索性成日着住件大褸,由開工着到返屋企,着足幾個月我都冇洗過。」

08ec9p9

雞髀當手槍,子華這個神探認真出位。

睇戲咪駁古

另外,有人質疑每次查案,子華總是與全組探員一起出動,似乎不合情理,對此他笑說:「如果要challenge香港嘅電視劇,咁冇一套可以睇多過兩集,香港劇集係玩劇情,唔玩真實性,總之唔論真確唔論反駁,如果唔係你就係tune錯台。」

08ec9p2

進軍影壇連番受挫,但子華未肯認輸。