黃子華教你做逆市生還者

2001年11月18日 | 東 Touch | #338

《生還者》大家就睇得多,無論係非洲版、澳洲版、定係蜜月狂奔版,都只係教大家喺荒島、森林入面點樣生存,之但係大家有幾可去到呢啲地方吖?呢個時勢,梗係對付逆市最實際啦!今期《東TOUCH》就專程搵嚟咩事都一句「又如何?」嘅黃子華,教大家做一個「逆市生還者」,各位讀者,學嘢啦!

方法一:大叫救命

打頭陣嘅方法係最容易,最直接,但係就最多人做唔到嘅,就係「大叫救命,搵人幫手」!

子華:「我可以話俾大家聽,有99.99%想自殺嘅人其實唔係想死,只係一時間攘受唔到現實,如果喺呢一刻有個人出嚟扶一扶,加啲安慰,咁就乜事都冇嘞!只不過依家啲人死都要面,唔肯認低威向人求救,講出嚟就咩事都冇啦!」

的而且確,好多人窮到冇飯開,都唔肯去攞綜援,就係怕俾人睇死!子華呼籲大家,遇到困難嗰陣,應該習慣「大叫救命,搵人幫手」,同朋友一齊面對,總好過自己鑽牛角尖。

方法二:面對現實

當想死嗰刻,朋友經已陪伴度過,跟住要做嘅,就係「唔好自欺欺人,面對現實」!

子華:「大家覺得輸股票,做樓蟹好慘,其實只不過係將期望放得太高;之前試過好景,家陣只係冇錢吃喝玩樂啫,就講到好似世界末日咁。其實人生一家有起有跌,唔會話一世都係高峰,跌咗落地咪爬番起身囉!好似搵工咁,搵唔到部長咯,咪做侍應囉;又好似爭人錢真係還唔到咯,咪破產囉。」

表面上睇嚟好似好消極,不過諗深一層,呢個先至係折衷嘅辦法,其實心理關口都幾重要,唔通大家一世都懷緬最光輝嘅日子唔向前行咩?

方法三:展望將來

如果方法二都解決唔到問題,不妨試下方法三:「忘記現在,展望將來」!

子華:「人生就好似一個旅程,其中一間酒店漏水,都只不過係一晚半晚嘅事,橫豎第二日都要走,根本唔重要。我好鍾意Tom Waits嘅《A Little Rain Doesn’t Hurt No One》,人生會經歷到好多小雨點,而呢啲小雨點,其實唔會造成傷害。大家可能覺得呢一刻世界末日,但係如果有人話『落雨其實好浪漫』,又或者有人遞把遮出嚟,就算係黑色暴雨又如何!」

方法四:K歌之王

大家係咪覺得以上三個方法好深呢? 其實仲有個簡單啲嘅方法,就係「去K場做K歌之王」嘞!」

子華:「唱K係香港人嘅文化,生日去唱K,失戀又係唱K,除咗工作,最多時間就係去唱K,總之唱K就成為咗生活嘅一部份,有咩比唱K更直接方便去抒發自己呀!」

就正正因為咁,子華部12月上映嘅新戲《男歌女唱》,就用唱K嚟做主題嘞。入面子華飾演一個自信心爆棚嘅人,最鐘意係唱K,3日不唱仲會死添。就係呢股動力,令佢改變咗身邊冇自信嘅阿梅,由「不能唱於人前」變到夠膽參加K歌大賽。

《男歌女唱》叫得做「K歌次王」,當然要唱得兩嘴,子華會在銀幕上大唱改編版的《超人迪加》及《都是你的錯》等。