黃子華過度衰格 眾叛親離

2000年 | 快週刊

他,貴為《棟篤笑》始祖;

他,是處境劇《男親女愛》的男主角;

他,憑一首「做隻普通的馬仔……」,唱到街知巷聞;

他,姓黃名子華,給人感覺總是「皮笑肉不笑」,但其實內裏另有乾坤……

美中不足

記憶中,子華曾當過晨早節目主持,演過舞台劇、電影、電視劇,做過《棟篤笑》,近期更加出埋唱片做歌手,連高官陳方安生、特首董伯伯都唱……

子華的確「周身刀、張張利」!

作為一位創作人兼藝人,能夠嘗試過多項的演出,實屬難得,但那張才是子華的「利刀」呢?

「基本上我係一個完美主義者,喺呢個世界無論做到點,我依然唔滿足,我認為每件事或每樣工作,其實可以做得更好。」子華很認真的說。

聽落亦有點道理,凡事若果加點要求,可能結果會比預期中理想;又或者做事落力點,最後亦可能如願以償。

子華更慨歎唱歌不易,因為這始終是一門技術,需要花上很多時間去練,但正所謂「千年道行一朝喪」,他欠缺的,便是時間。

拒絕評價自己

但現實歸現實,子華大大話話也是個男主角,憑他在《棟篤笑》的精采演出,加上《男親女愛》的出色演技,他已被奠定為一線喜劇演員,一站出來已經可以令人笑不攏嘴。撇開當男主角不談,就算子華曾經做茄哩啡或配角,亦沒有令大家失望過。能有這樣的成績,也全靠他個人付出的努力。

既然成績有目共睹,亦即是說他的演技已被認同,但子華卻堅拒給自己作任何評價。

他強硬地說:「我唔想評論自己,無論我覺得自己做得好定壞,最終決定權都在觀眾手中,佢哋(觀眾)心目中已有結果,唔使問我!」

一直以來,子華的形象總離不開「搞笑」及「無賴」(做戲時),但作為藝人,個人形象非常重要,形象不好,觀眾便會對自己大打折扣,影響到自己的事業發展。

子華卻不同意,他說:「我完全不介意,我諗如果當年《狀王宋世傑Ⅱ》裏頭『賴三』呢個角色觀眾都哽得落嘅話,相信都應該無嘢哽唔落嘞!」

被朋友離棄

九九年,子華憑着《狀王宋世傑Ⅱ》一劇裏「賴皮三」一角突圍而出。此角卑鄙無賴之極,子華演來出神入化,雖然戲分不及張達明飾演的宋世傑多,但一樣得到一致好評。不過,好的背後總有代價:

「那時在馬來西亞生活的朋友竟然話睇到要熄電視,佢哋覺得這個人(賴皮三)太過分、太衰格,雖然大家是朋友,但佢哋覺得唔可以接受一個咁衰的人。」子華瞪大雙眼,不能置信的對我說。

踏入二千年,他終嘗得當男主角滋味,角色當然不再是無賴、下流、賤格……

「《男親女愛》內余樂天呢個人非常古怪,經常口不擇言,但佢依然係逗人開心嘅角色,全無傷害性。」

是的,子華就是憑着「余樂天」這角色,在電視圈中冒起,與鄭裕玲同時成為城中人氣演員!

自我增值不計酬勞

無論任何人做任何事,往往都是為了金錢、利益……但今時今日的子華,名與利已經得到有餘,那他現在又為什麼而工作呢?

「我會睇嗰件事或嗰份工作能否為我增值,酬勞真係其次。舉個例,對我嚟講,拍電視劇所賺嘅錢唔多,但確能為自己增值。」

「呢一刻重有乜嘢想做但未做到?」記者問。

「我每日都問自己呢個問題,但最後結果係無囉!我成日諗,自己已經日日拍嘢,究竟重有乜嘢可以做;再諗深一層,依家做緊嘅事,已經係自己幾想做㗎嘞,其實呢度(指拍電視劇)幾好玩,或者我玩完呢度再算啦!」子華輕鬆的說。

多年來,大家看他面上的笑容,總以為他是那種凡事抱着樂觀態度面對的人,事實上,他只是很會控制自己的情緒而已。

子華不諱言唯一能令自己改變的,就是在外表上,但心裏那份不知名的東西,始終變不了。

至於執着,子華則堅持的說:「有!」

「對於演藝上的質素,多年來我依然執着;我要面對嘅,不只做完一套劇就算,而係點樣去將一個角色做好,這是唯一的壓力。其實如果自己可以放鬆啲嘅話,相信出嚟嘅效果必定更好。」

十年計劃

「有否諗過幾時正式退居幕後?」記者問。

「以前有但依家無。以前我以為很多事情都喺自己掌握之內,只要計劃好就做得成;但依家我發覺,原來好多事係計劃好但做唔到。曾幾何時我有個計劃,就係要拍電視劇,但呢件事足足延遲咗十年之後先做到!」

「又例如以前諗住十年後就拍電影,但誰不知竟然唔使等十年已經拍咗好多套。我覺得好多事都係意料之外,冇諗過嘅偏偏就會發生。目前唯有想做的就做,唔勉強自己。」子華說。

後記:搭巴士

拍攝當日記者「強行」帶了黃子華去搭巴士,一個當紮男主角,在一個熙來攘往的巴士站等巴士,途人自是紛紛對他報以好奇的目光。

子華說:「我成年未搭過巴士嘞!」