相約黃子華做訪問，問他愛吃甚麼，他說：「茶餐廳嘢食！」子華愛茶餐廳的程度幾近瘋狂，在香港的日子，每日例必去茶餐廳打躉，甚至狂到把屋企一角裝修成茶餐廳卡座位。子華說：「我愛茶餐廳多過半島！」

靈感泉源

子華細細個已經去茶餐廳，正如佢話「所有香港人都係喺茶餐廳長大嘅」。不過要數真正愛上茶餐廳，卻是廿多歲由外國回來後的事。

「全世界淨得香港有茶餐廳，喺外國根本搵唔到。可能物以罕為貴啦，返嚟我就開始鍾意去茶餐廳，因為喺呢度你可以搵到一個完全無裝飾嘅世界，啲人好真實、好親民，坐吓觀察吓呢度啲人做乜，偷聽吓人哋講嘢，可以攞到好多靈感。我以前棟篤笑都試過講深水埗茶餐廳有20蚊『臣』咁大嘅牛扒，諗嚟諗去都唔知點解可以咁平？呢啲咁生活化嘅題材只有喺茶餐廳攞到。」

子華說自己很犯賤，要他揀他寧願去茶餐廳好過半島。「去到啲大酒店，個個著到靚一靚，全部都係修飾過嘅，好虛假，一啲人情味都無。」

愛舊唔愛新

雖然茶餐廳梗有一間喺左近，但子華只愛古舊嘅茶餐廳冰室。「我好鍾意嗰種古古哋嘅味道，呢種氣氛好似媽媽、阿婆個年代。坐喺度好似返番去以前，諗番好多細個嘅嘢同屋企人發生嘅事，搵番好多過去嘅回憶。」

子華說油麻地廟街美都是他打躉茶餐廳熱點之一。「幾年前有個朋友帶我嚟呢度，我一入到嚟已經感覺好正，上埋條舊式樓梯到二樓，嘩！咁鬼開揚嘅，陽光四射入嚟，仲可以望到出面榕樹頭。仲有嗰啲階磚、呢種絕跡嘅綠色窗框同埋個痰罐，簡直有驚為天人嘅感覺。美都已經有五十幾年歷史，呢種feel係出面啲茶餐廳模仿唔倒嘅。我鍾意一個人嚟，拎本書，攞啲嘢嚟寫吓。我試過有次坐喺度望住榕樹頭三個鐘，就係『步』住個後生仔點樣由一個棋竇轉去另一個，好有趣味。」子華說這才是真正偷得浮生半日閒。

食得撚手

子華說去茶餐廳食嘢唔應該咁講究。「去得茶餐廳你就預咗個廁所係污糟嘅，個杯係崩嘅，就算食食吓有隻烏蠅飛落嚟都應該潷開，繼續食唔使投訴。不過反而係要食得撚手。

「好似你去何文田奇香就梗係要食牛肉意粉、新發就乜鬼立雜叫一餐，嚟美就一定要叫焗飯，呢度個焗飯炒完再連炸過嘅排骨放入舊式焗爐焗，特別香脆好味。呢度嘅菠蘿油都好食，個菠蘿包唔使大，啱啱包住嚿牛油就得，包要熱、牛油要凍，一口咬落去冷熱交集，每一啖都成口油香，正呀！」

子華到茶餐廳另一樣必叫的是奶茶，「茶、奶、糖分量各佔1/3就最順滑香口啦。一間茶餐廳如果連奶茶都整到澀就好似做演員口窒窒咁，不如就唔好做啦！」子華雖然吃得不講究，卻仍有自己的執著。

後記

做完訪問，我們正在收拾，子華卻繼續望著出面的榕樹頭很入神。這刻的子華沒有了星味，卻多了份感性。旁人繼續他們揭報紙、吃多士的動作，沒有因為多了明星在場而起哄。在這裡子華可以做番自己，呷著他的奶茶，享受一下真正的偷得浮生半日閒。