有話兒 ─ 黃子華:普選消怨氣

2013年12月28日 | 蘋果日報

黃子華相隔四年再拍電視劇,不幸遇上不滿電視霸權而發起的熄機大行動,他直認劇集播完才鬆一口氣,但也慶幸適逢其會見證歷史。子華認為歸根究柢在於香港人條氣唔順,以致對細微事如睇電視都看不過眼,並相信需要有公平公正的普選才能解決怨氣,他說:「當然唔係可以能醫百病,但至少可以搞番順條氣。」

無綫近年的劇集質素及收視不見突出,黃子華的《My盛Lady》被寄予厚望,對他而言,收視多少同樣搏命,日前他說:「我係想演好嘢畀觀眾睇,做唔做到一件事,每次盡力做,唔理氣候係點,我係試過拍《一蚊雞保鑣》嘅人,用咗好多心機,裏面有咁有趣嘅嘢,但最後仆街仆成咁!」

28ed18p10

黃子華相隔四年拍劇卻遇着封殺,他不諱言正好讓他見證大時代。

捲漩渦有歷史感
《My盛Lady》曲終人散,收視不算太理想,但令他成為視帝,問到可覺遇着熄機行動感覺生不逢時?子華笑言:「我反而覺得係適逢其會,香港開埠以來未試過有封殺電視行動,咁啱我撞正個大時代,好有歷史感,感覺自己喺呢場政治角力上,捲入咗個漩渦中,播完至鬆一口氣。」

直至劇集播完,子華正式抽身而出鬆一口氣,對於香港電視最終取得流動電視牌照在明年7月1日開台,子華認為結局圓滿,他說:「我贊成政府應該發三個免費電視牌㗎,無綫唔同意無可厚非,我都想全世界得我一個做棟篤笑啦!但作為行內人,點解唔希望有更多機會、更多元化社會?即使我想一個人做晒棟篤笑,但社會都想多啲其他人做,所以我希望王維基成功,行內都多機會。」

28ed18p12

子華每部作品,從不問成果,只求將自己認為最好的,帶給觀眾。

近年娛樂圈政治化甚至是政治生活化,社會怨氣大,藝人都不能倖免被要求表態,子華笑言:「喺呢個社會冇漏網之魚啦!喺中醫立場,係條氣唔順,成個社會都係,一個人條氣唔順,做乜嘢就算係睇任何電視台、電台或者睇樓,樣樣都頂住,一日條氣唔順,社會就會越嚟越細微都睇唔過眼,其實條氣唔順好簡單啫,執一劑藥,『普』伏苓加『選』七粉,五碗水煮埋一匙派嚟食,即係要有好公平公正嘅普選,如果唔係,條氣唔順就冇嘢傾得埋,當然食咗唔係能醫百病,但起碼順咗條氣先,條氣唔順好大問題㗎。」

28ed18p13

子華即將要準備明年演出的棟篤笑。

「表態等於冇份工」
藝人應否關心政治,子華認為是個人選擇,不一定要藝人表態,他說:「喺一個自由、容忍、包容社會唔應該咁做,有啲人表態等於冇咗份工,唔應該逼人表態,咁咪同中世紀嗰啲你係咪信教,唔信就捉去燒嘅一樣?特別逼一啲藝人表態,喺香港搵唔到食下個月冇租交點算,但若佢自己表態,大家同意與否佢都會為自己負責。」

28ed18p14

子華不諱言支持普選。

子華續說:「我哋冇辦法唔承認香港大勢係咁,以前一齊工作嘅人,依家好多人收入來自內地,入唔到內地市場可能要轉做生意、搬運、剪頭髮,因香港容納唔到,香港電影有幾多人可以維生?正正因為條氣唔順,大家要求社會時亦要對自己有要求。」

28ed18p11

早前子華(左)主演的《My盛Lady》,收視並不突出。