男神黃子華10月喺紅館舉行棟篤笑《唔黐線唔正常》，當時雨傘革命正進行得如火如荼，有傳因為內容涉及敏感佔中題材，所以子華唔單止被列入內地封殺名單，甚至連喺內地巡迴演出都要取消，不過事後子華嘅經理人就否認呢件事，仲話會如期進行。

其他藝人如期演出
馮仁昭噚日喺網上見到一張喺11月尾發嘅聲明，內容係話子華上星期六喺廣西體育中心體育館嘅《唔黐線唔正常》南寧站演出，因為受南寧大橋兩邊路口修建行車天橋，往返體育中心嘅車要兜路行，主辦單位考慮觀眾要適應交警部門發出嘅行車路線，為咗減少影響，所以決定將個騷改喺下年2月7日舉行。
不過最奇怪嘅係，喺呢段修橋改路期間，鄧紫棋（G.E.M.）、林俊傑分別喺上個月22號同呢個月6號如常喺呢個場館演出，李宗盛仲會喺後日開騷㖭！唔通真好似傳聞咁講，子華俾人封殺？呢個係子華喺內地巡迴演出嘅第一站，所以有網民都擔心內地其他地方嘅演出都會受影響，噚日馮仁昭打畀子華嘅經理人了解，佢話：「唔關事，佢哋嗰邊都係咁講，我哋2月都會繼續做，我哋月尾都要返廣州開騷。」

子華喺廣西嘅棟篤笑因為整路而取消，但其他歌手冇受影響，認真莫名其妙！