棟篤睇:黃子華抽乾政治水

2012年10月6日 | 蘋果日報

52歲黃子華前晚在紅館為第15輯棟篤笑《洗燥》開騷,首場吸引不少藝人,包括郭藹明、葉德嫻、許志安、蘇永康、黎耀祥夫婦、蔡一智夫婦等。全晚主題圍繞一個「燥」字,表面談及港人燥的原因,實則抽乾政治水,由中港矛盾、國民教育、李旺陽事件、梁振英、陳茂波、反日政治話題,到港人貼身的樓價問題都有,每觸動港人之痛時,全場即捧腹大笑,但笑中有淚。

國民教育
國民教育指引衍生出來的教材騎呢,並引導學生聽國歌要感動流淚,子華前晚以「母親」來比喻中國,他說:「又話母親節唱歌要喊,但真係喊唔出,呢度係香港,唔係北韓,死時先喊,文化太唔同,都唔知邊個想要唱到喊,我想同諗嗰個講,伯母幾時生日呀?我哋唱歌畀伯母聽。」

撤與切
提到學民思潮召集人黃之鋒兩度拒絕與特首梁振英握手,子華便說:「堂堂一個人畀手同你握,你條死仔同我鞠躬唔握手,打你就有失身份,唔打你就難忍。當事人唔夠聰明,應該退後兩步,講承讓承讓。呢班仔由朝嗌到晚,仲要嗌切(撤),我男人嚟㗎嘛,又做打交叉手勢,分明係一把鉸剪,叫乜嘢切,我都軟化咗啦。其實呢個時候應該推你老婆出來講嘢:『你哋叫佢切,佢切咗我點樣,我死畀你睇!』」

李旺陽事件
表面談及香港回歸後,母子關係(中港關係)發生大矛盾,實則暗諷李旺陽被自殺事件荒謬,子華說:「大家文化好唔同,香港人成日話吊頸都要唞下氣,我哋母親就發明咗腳掂地吊頸,即係吊頸都可以唞氣。」

劏房波
陳茂波早前被揭經營劏房,竟推老婆做劏箭牌,全城震怒。子華乘機抽水:「我哋母親好多做官都貪污,香港呢樣嘢追得好貼,佢哋高官老婆殺人,咁我哋香港點呢,係唔係等如陳茂波老婆殺人?佢開劏房唔係殺人。」

反日情緒
中日關係因釣魚台主權問題升溫,子華當晚穿的服飾是日本貨,他說:「我怕有人叫我除晒佢,其實得條鞋帶係日本貨,我聽日會換走埋佢,我阿爺成日問我買乜鞋,鬧我買埋啲膠鞋,佢覺得買對鞋要行到去釣魚台……」

寸強國人
國慶假期期間,尖沙嘴廣東道已被「強國人」攻陷,一車車內地旅客蜂擁入名店掃貨,令港人汗顏。子華說:「現代女性嘅性徵,除咗有子宮外,就要有LV,事業線唔夠,唔使驚,買LV啦,有LV就兒孫成群,冇LV就獨自一人,唔知係唔係冇LV會令子宮萎縮。」

影帝助陣
子華今次請到影帝劉青雲和視帝黎耀祥拍攝短片,在開場及中段時播放,青雲在短片中扮子華的經理,指子華沒公關便吃屎,而祥仔則扮警務處長,子華說:「又有視帝又有影帝客串,佢哋片酬夾埋二千萬冇走雞,為咗你哋孭住二千萬債,但我唔後悔。」

06ed2p1

黃子華歷年棟篤笑
黃子華是香港棟篤笑的始祖,90年從西方引進「Stand-up comedy」的表演藝術來港,並將之譯名為棟篤笑,二十多年來共舉行了15次棟篤笑。

06ed2p10
分析李小龍對港人影響時說:「原來讀得書少都咁有型㗎,以後一到考試,我讀得書少,阿Sir你唔好考我!」
《娛樂圈血肉史》1990

06ed2p11
解構一個人是否鹹濕時說:「一個人鹹唔鹹濕,就係睇吓佢有冇呢樣嘢(指着自己下體),有就鹹濕,冇未必唔鹹濕。」
《色情家庭》1991

解構人與人之間的隔膜時說:「有冇諗過點解咁多人鍾意打麻雀?就因為朋友之間都冇乜好傾,坐埋砌啦!」
《跟住去邊度》1992

論到菲傭時說:「香港咁細一個島仔,養起咗成個國家,菲律賓呀!依家香港人生仔可以冇老婆,但唔可以冇菲傭。」
《末世財神》1994

06ed2p15
講述童年被鬼妹怒罵:「一兜避能嘻呢!」即(You don’t belong here!)。
《棟篤笑雙打之玩無可玩》1995

06ed2p16
「我準備咗兩個棟篤笑,第一個準備咗嘅棟篤笑係準備咗嘅棟篤笑;第二個準備咗嘅棟篤笑係一個冇準備嘅棟篤笑,但係我為呢個冇準備嘅棟篤笑,都準備咗好耐。」
《鬚根Show》1998

教授港人解答難題時的萬能詞彙:「搵食啫,犯法呀?」
《拾下拾下拾年棟篤笑》1999

06ed2p18
「當日我點解學首德文歌,係因為想媾一個識德文嘅女仔,問題我識咗首德文歌之後,先知佢識嘅係意大利文。」
《鬚根Show2》2000

06ed2p21
以「魚蛋論」去闡述香港怪現象:「做乜大家買串魚蛋一樣咁多錢,佢多我兩粒㗎?我唔要你畀番兩粒我,我要你攞走佢嗰兩粒!」
《冇炭用》2003

06ed2p22
在討論甚麼是化妝時說:「化妝就係你落咗妝,我仲認得你,你落咗妝,我唔認得你,嗰啲叫做喬裝。」
《兒童不宜》2006

06ed2p23
解構「從來」這個詞彙時說:「『從來』其實就係講緊第三次,即如果一個人衰多過兩次,衰到第三次,佢就從來都咁衰㗎嘞。」
《越大鑊越快樂》2007

似在暗諷天真嬌時說:「乜嘢叫做天真?就係你相信一個藝人嘅形象就係嗰個藝人,咁樣就叫做天真。」
《嘩眾取寵》2009

論及夢想時說:「有夢想與冇夢想嘅人嘅分別,係冇夢想嘅人會被人逼死。」
《娛樂圈血肉史2》2010