黃子華潘燦良舞台劇 《最後禮物》宣布加開10場

2022年8月24日 | 明報

黃子華、潘燦良主演的舞台劇《最後禮物》宣布加開10場,子華昨晚完成第25場演出,於謝幕時突然驚喜宣布加場,門票8月26日早上10時公開發售。

子華昨晚與一眾演員謝幕時說:「有個特別消息公布,其實都唔係好關你哋事,呢個消息係我哋會加開10場!如果你哋今晚睇完之後,有少少不滿意,你等我哋星期五加咗場賣飛先好去同人講你嘅不滿。但如果你真係不滿,我要恭喜你,因為你個家庭一定好幸福。咁仲有朋友想睇,你哋就幫我話聲佢哋聽…」

潘燦良說:「香港仲有好多好嘅演出等緊大家去支持,係我哋同期或者跟住後面,仲有好多唔同題材又精彩嘅舞台劇。嚟緊中秋節,大家可以去睇埋香港人要支持嘅香港電影。」有台下觀眾大叫《飯戲攻心》。子華感謝潘燦良為他宣傳電影,也回禮說:「嚟緊有個舞台劇叫《短暫的婚姻》,係潘燦良導演,大家記得支持。」

完成25場演出,潘燦良稱有一點累,子華笑謂:「佢真弗過我,我攰到每日都虛脫。」對於外界要求多開20場,子華耍手擰頭:「唔好再加,10場夠啦!原則上我想做埋聽日就休息,但知道真係好多人想睇到一個咁好嘅製作,咁好嘅表演……加上我發現好多人睇完之後,個劇帶畀佢哋好多反思,對佢哋有一個『好』影響。有睇過都知,我哋個劇係講家庭,所以我先搏埋條命做多10場。我哋係孫悟空就好啦,可以做幾百場,但係50場對我嚟講,真係盡啦!」

潘燦良直言:「舞台係神聖嘅,得咁多就咁多。不論係演嗰個,同睇嗰個都要好好珍惜,舞台價值先存在。」子華續說:「真係同生命一樣,如夢如幻如泡影。」

12647f3cc8dc98f7d6820630a90eb801

黃子華昨晚完成舞台劇《最後禮物》第25場演出後,於謝幕時宣布加場。