黃子華胸有成竹有獎攞

2004年11月13日 | 東方日報

黃子華目前仍在橫店拍攝劇集《九品芝麻官》,他直言會趕返港出席無綫台慶,問他是否趕着返港攞獎?他開玩笑說:「無綫有成十幾廿個獎,大大細細點都有個畀我啩!」其後他認真說:「其實返嚟出席係支持無線啫,攞獎隨緣啦,攞到固然開心,冇獎亦冇乜嘢,你估今次係攞一百萬咩,啲錢就梗係爭住攞啦!」

子華自言與無線合作愉快,但會否再拍劇則尚未傾,但他不會為增加攞獎機會而拍劇:「同無綫關係好好,拍劇要視乎題材,啱就會拍。不過我明年要出唱片、做《鬚根Show》,未知有冇時間拍劇。」

對獎項抱平常心的他,最渴望是好友蔣志光能攞獎,他說:「我希望蔣志光攞實力非凡男藝員獎,我同佢合作咗兩次,《男親女愛》同《棟篤神探》,同佢合作冇人唔鍾意佢,佢人緣好好,希望佢可以得獎。」