郭富城﹑黃子華﹑陳嘉桓等，今晚出席喺中環舉行嘅一個雜誌頒獎禮，子華膺「Man at His Best」，問佢邊方面最好所以得獎，係口才﹑人品定外貌？子華表示：「原本以為大會頒娛樂大家獎項畀我，因為可能有娛樂性，就算冇做嘢，呢輪都有自己劇集播返，以為好似紀念我咁。」

子華續說：「the best意思相信係可以氹得啲觀眾好開心，私人朋友唔會entertain（娛樂）佢哋，因為唔需要，前排有朋友因為唔開心，話睇我作品可以頂一頂開心下，好似幫到下手。」

問子華會否拍多啲劇及其他作品？佢話：「我都想，不過自己要求愈來愈唔同，要求慢工出細貨，仲係極慢嗰隻。（諗過拍劇？）劇集都想拍，除咗笑片外，好似秋生哥（黃秋生）演唔同角色都好，做一啲另外唔同角色，當然要有幽默感啦。」

講到城城高調認愛，戀上27歲女友Moka？子華就話：「我好少留意呢啲嘢。（城城有27歲女友？）我點會評論人哋嘢？」

咁子華會否公開自己感情？佢話：「我一向都係公開，只係我唔會主動做，如果有啲乜我唔否認之嘛。」

之前影到子華同個女仔一齊？問到係咪女友？子華大方承認：「係！」有傳子華結咗婚？佢諗咗一陣：「多謝大家關心，我要澄清係冇，但如果就算結婚，我自己唔會主動同大家講，現階段亦唔打算咁做。」