佘詩曼、楊怡、組合農夫、Cara G.及吳卓羲等藝人，今晚喺中環8號碼頭香港海事博物館出席一雜誌嘅頒獎禮。今日天氣涼涼地，但啲女星依然以春裝上陣居多，但大會就好似唔係好貼心喇，竟然安排喺戶外進行訪問同影相，見到啲藝人頭髮亂了，情況真係有啲狼狽。

阿佘身穿斜膊露肩裝出席頒獎禮，講到佢有份拍嘅劇集《使徒行者》同《天與地》，被網民選為近年必看電視劇，阿佘非常開心！佢話：「嚟緊3月會同黃子華合作電影，喺7年後大家再合作，依家有時間都會同子華約出嚟傾劇本。」講到馬國明早前拍大台劇集，接連開工接近28小時，阿佘謂拍電影亦有類似情況：「試過之前拍完電影接電視，之後再接電影。其實過程唔緊要，最緊要嘅係結果，觀眾鍾唔鍾意。」