黃子華昨日在宣傳活動上繼續發揮搞笑本色，周圍辣火頭，不但玩楊秀惠，就連觀眾都不放過，寸得就寸，難怪他說：「我就嚟畀觀眾打！」

黃子華、葉童及楊秀惠等昨日出席無綫宣傳活動，鬼馬的子華即場發揮「奸人堅」本色，辣盡全場，無論演員、觀眾以至高層都無一幸免，不過此舉為現場觀眾增添了不少歡樂氣氛！

活動前，子華除了指無綫高層陳志雲是他的「Honey」外，又笑言睇好李司棋攞飛躍進步女藝人獎，噏得就噏！問到有否信心奪台慶「男主角」？他說：「冇！唔係我唔好，係人哋更加好。」活動期間，子華在台上指着穿熱褲的楊秀惠說：「觀眾遠睇以為你冇着褲！」

及後與現場觀眾玩遊戲時，子華先指着一名肥仔觀眾，指他身高雖然未夠三呎，但磅數比他還重，轉個頭再指着另一名哨牙觀眾說：「又係哨牙鬼！你個口僭建，可以塞多幾粒提子都得喎！」

形象奸減少出街
事後問到會否擔心激嬲觀眾？黃子華說：「點解嬲？（你話佢哨牙鬼？）唔係話佢，我係同葉童講。（你話人哋個口僭建？）見佢嘟長個嘴食提子咋！唔好整奸我形象，我就嚟畀觀眾打，所以依家冇乜嘢都唔會出街。」此外，他自爆將會擔任《志雲飯局》嘉賓，笑言擔心太暢所欲言會講錯說話。

黃子華見到穿熱褲的楊秀惠，即笑她「冇着褲」，搞到對方尷尬狂笑。

黃子華與觀眾玩遊戲時毫不客氣，踩得就踩！

黃子華與陳志雲主持揭幕禮，揶揄他是「Honey」。

黃子華大受歡迎，Fans紛紛索簽名。

葉童留港宣傳劇集捧自己場，希望新劇收視報捷。