郭富城、春夏主演，翁子光導演嘅三級電影《踏血尋梅》，之前喺香港國際電影節播映，吸引咗好多圈中人去捧場。
而呢部戲已經安排咗下個月上映，仲吸引到好多名人撐場，首先呢套戲喺電影節嘅版本有成120分鐘，事後睇過戲嘅阿叔張叔平就幫套戲剪咗個100分鐘嘅緊湊版，據知上映嘅時候就會分別上演「導演版」同「阿叔版」，鐘意細緻嘅可以睇長版，睇慣緊湊情節嘅觀眾就可以欣賞「阿叔版」，至於參展金馬獎嘅版本就用返長嘅「導演版」。
呢套戲唔止有阿叔幫手剪片，仲有男神黃子華都走出嚟支持，佢專登拍咗條短片話：「其實我自己嘅片都好少宣傳，今次我可以好負責任咁講，我好高興可以睇到呢部電影。」而喺戲裏面女主角春夏不時都會哼首《娃娃看天下》，原唱者鄭秀文（Sammi）亦都因為聽咗春夏嘅版本，專登同佢做咗個對談。
自言睇咗套戲兩次嘅Sammi話好想知春夏係用乜嘢心情去唱首歌，同埋佢話春夏畀兇手鍊死、帶住笑去迎接死亡個幕好震撼。春夏就話戲中嘅女仔唱《娃娃》嘅時候，感覺好孤獨，覺得冇人瞭解同冇朋友，春夏話同戲中角色嘅女仔都係好鍾意諗嘢。
子華笑言平時連自己嘅作品都唔會宣傳
