出爐「視帝」黃子華昨日盛裝到電視城拎獎，對於被指以劇換獎，工作排到密麻麻的他表示已沒有檔期，又指視對手張智霖和太太袁詠儀為親人，故不想影響關係。

缺席頒獎禮的子華昨日由無綫高層區偉林手中接過獎項，一眾劇集《My盛Lady》演員王君馨、林子善、阮兆祥、陳敏之和監製文偉鴻到場打氣，並高呼「視帝」、「教主」。子華引述某議員對追女仔「三不」的態度，形容自己對獎項亦是「不主動」、「不抗拒」及「不負責」：「話今次有內幕交易，但下年無綫叫我返嚟同鄭裕玲做節目我都推咗。以後有人約我唔係叫出街，係視帝起駕！」

談到有網民指失落視帝的張智霖（Chilam）和太太袁詠儀（靚靚）不服輸，子華表示絲毫不覺，並稱多年前與靚靚合作拍電影《情人知己》，自此以「表哥」、「表妹」相稱，更見證她和Chilam拍拖、生仔，當正他們親戚：「我係唔會講任何引起誤會嘅說話。（靚靚有冇打嚟恭喜你？）佢冇我電話，呢方面一個字我都唔會講，唔想影響我哋親戚關係！」

子華又大讚今次不出席頒獎禮都有獎，是超越整個無綫向前行，並強調明年檔期緊密，除客串多部電影，還宣布年底舉行棟篤笑，問到會否因獎加價？打自己工的他笑言惟有加人工。

張智霖堅稱賽果正常
對於黃子華的「親戚論」，Chilam笑說：「佢錫我哋，我哋都好錫佢㗎！我一直都話呢個賽果最正常，大家各有支持者，我好支持子華攞視帝！」

補拎視帝獎座的子華Chok晒甫，幾得戚！

子華獲劇中拍檔祝賀，幾位女士更送吻獎勵！