最近回帶睇番黃子華喺97年《秋前算賬》棟篤笑嘅煮田雞論：「阿叔話共產黨好恐怖呀，你成日覺得我呃你，危言聳聽。你覺得而家（97年）幾好，冇事呀嘛？你知嘛，如果你用滾水煮隻田雞，佢會噗一聲跳番出嚟。因為佢覺得痛呀，煲水熱呀。但係如果你將隻田雞放入凍水度，然後先慢慢煮佢……隻田雞會諗幾舒服呀，仲望吓隔離棵莞茜喺度做乜呢？」

呢個煮田雞嘅故事，回歸17年後聽番真係百般滋味。雨傘革命以嚟示威者因為佔領主要馬路導致民怨四起，呻塞車呻冇生意做。香港人唔係寧願匿入大鍋做田雞，俾中央用慢火炆熟呀？

其實佔中對部份市民生活構成不便，但並冇觸發新嘅經濟問題。入境處上星期公佈，今年十一黃金周有109萬內地客訪港，比舊年增加6.8%。本港經濟發展比97年更繁榮，但本港中產階層並唔覺得共享經濟成果，貧富懸殊逼埋身。量度社會財產分佈的堅尼系數自回歸後創新高，而家香港人收入差距，仲勁過美國、英國同新加坡。相反，本港首富李嘉誠身家水漲船高。《福布斯》估計李超人身家由97年嘅124億美元暴增至314億美元。

最後，黃子華煮田雞嘅故仔係要話畀香港人知，大家要居安思危。當大家居安，覺得好舒服時，根本就好危！

黃子華講煮田雞嘅故事，係要話畀香港人知要居安思危，當大家居安，根本就好危！