【食過牛歡喜嘅人】子華神寸爆唱情歌要有形象:鄭中基就咩都放落口嘅

2017年1月31日 | 蘋果日報

鄭中基尾場嘅嘉賓一直都係呢個演唱會嘅重點,噚晚出場就係子華黃子華黃子華同Ronald喺電影合作過,早年Ronald同陳嘉上聯合執導電影《神秘寶藏》,子華就扮張保仔,兩個就成為咗好朋友,所以噚晚就現身做嘉賓。

子華神着住西裝插住袋出場,觀眾尖叫成分鐘,子華神先可以開始講嘢:「大家放心,鄭中基係出咗去門口,去鬧啲一嗌Encore就走嘅人。Encore點解叫Encore呀?係會嗌N咁多次㗎。佢依家出咗去叫我上嚟頂一陣,我一向對唱歌嘅人有一個好大好奇心,點解成日唱歌就走埋去握手掗時間㗎呢?我自己從來未試過,好想去試下,我想做一個實驗,我依家同你握,你嗰邊啲人係咪覺得好討厭吖?握到極咪握廿個,呢個仲唔握嘅添,花晒時間喺呢一邊,你後面嗰啲覺得討唔討厭呀呢個行為?但係新年要做㗎,有利是㗎嘛,點解Kelly有,我就冇?」

子華神又話:「我就講一句咁多啦,有關鄭中基,呢個奇人嚟㗎,大家覺唔覺得呀?大家知道一個歌手唱情歌,係唔可以亂食嘢嘅,但係鄭中基呢咩都放落口嘅,唔係講一般嗰啲煎炸嘢呀,即係你做唱情歌嘅人,你一定要形象㗎嘛。」

呢個時候大家真係唔好亂諗嘢,子華神真係講緊食物啊,唔好諗錯隔籬,子華神話:「你冇見過張學友拎住條臘腸當波板糖咁咬。即係你見佢唱《每天愛你多一些》,愛咩呀?臘味呀?你有冇見過張國榮食牛雜吖?冇㗎嘛!『風繼續吹,嘩!吹凍晒!不忍遠離,心裏亦渴望留下食到尾!』咁呀?鄭中基係食過牛歡喜㗎!一個食過牛歡喜嘅人點可以唱情歌呢?」可能大家唔知牛歡喜係咩,即係牛嘅陰部,鄭中基喺電影《低俗喜劇》入面,演嘅角色暴龍哥好鍾意食。

講完之後子華神就扮鄭中基唱歌:「讓我為你哭。咁呀?哭咩呢你咁歡喜。」一唱完子華神就意識到台下有小朋友,佢就話:「有啲人唔知咩係牛歡喜,有細路喺到添,大鑊喇,向你隔籬個位解釋下啦。牛歡喜就喺一個地方,啲公牛好鍾意去(全場大笑),喺瑞士。任何人都唔咁樣可以食過牛歡喜再唱情歌,只有鄭.中.基。」

1485790858_d21c

1485790062_ebae

子華神又問:「點解成日唱歌就走埋去握手掗時間㗎呢?」

1485790063_a003

1485790064_fdd9