「男神」黃子華同佘詩曼今日喺上環為新片《棟篤特工》進行開鏡拜神，佢哋相隔7年再度合作，子華對阿佘話：「對你嚟講就好短，對我嚟講就好長，你開心啲，7年冇見我。」阿佘即刻話：「唔係你開心啲？7年冇請食飯。」子華笑言今日只帶咗一個斗零都冇帶銀包。

子華透露喺戲中飾演一名受聘於阿佘嘅人，主要係使晒阿佘啲錢。問到有冇感情線？子華話：「有，我同阿佘行埋就係情侶啦，唔使做任何嘢。」有親熱戲？子華繼續話：「唔係想像中咁，係非常咁奧妙，唔係一般嗰啲，嗰啲對我嚟講係微不足道。」

問到子華係咪花咗好多心機喺劇本上？佢話：「問阿佘等咗幾耐，原本係1年前拍，依家都第10稿。」阿佘表示以為係第6稿，子華話：「希望畀靚仔啲、完美啲嗰個（劇本）畀你。」提到阿佘飾演一位香港權力最高嘅人，係咪因爲想貼近社會，所以劇本一改再改？子華話：「好近社會，好離地都喺晒入面。」點樣離地？子華話：「我係007嘅師傅，冇冧巴嘅，你話幾離地。」阿佘角色有冇影射成份？阿佘話：「影射又唔係，呢個職位，香港都有呢個職位咁解，冇政治上嘅嘢。」阿佘嘅角色有冇咩特徵或者打扮？佢表示係一個全新造型。

問到對票房有冇壓力？阿佘話：「又唔係我哋控制到，我哋有神級編劇。」子華笑住話：「我慣咗冇票房，你話我有冇壓力吖，我一啲壓力都冇，不過阿佘係億億聲嘅女星，唔好累阿佘，影響佢嘅「億譽」，相信佢個人咁旺，近啲佢，食燒豬都會好味啲。」阿佘即刻叫子華多啲請食飯，子華即嗌監製：「買啲飯盒靚啲！」

子華神話今次整到最好嘅劇本先俾阿佘。