子華自爆親戚錫住Chilam

2013年12月20日 | 東方日報

出爐「視帝」黃子華昨日到電視城領取「最佳男主角」獎項,他對於張智霖(Chilam)被指不服輸、袁詠儀(靚靚)為護夫又跟網民開火一事,子華強調不會講任何引起誤會的說話,因多年前子華早已當正靚靚、Chilam是「親戚」,不欲影響「親戚關係」。

子華揮低Chilam奪得「視帝」寶座,Chilam在頒獎禮台上的「義氣仔女論」掀起軒然大波,其妻靚靚收過鑽石手鈪禮物後,於微博上留言「多謝」無綫卻遭網民攻擊兩人輸不起,令護夫心切的靚靚與網民爆罵戰。昨日出爐「視帝」子華現身領獎,無綫安排記者會並邀請一眾劇集《My盛Lady》演員阮兆祥、陳敏之、王君馨、林子善以及監製文偉鴻出席打氣,子華一身禮服打煲呔,當從無綫高層區偉林手上接過視帝獎座時,眾人歡呼吶喊「視帝」、「教主」。

「起駕」起價
子華引用某議員對追女仔要採取「三不」態度來解說獲獎項感受:「三不係不主動、不抗拒同不負責,我聽到又話今次有內幕交易,坦白講無綫叫我下年返嚟同嘟嘟(鄭裕玲)做節目,我都冇時間推咗,真係要排我個期,可能要比普選更耐,希望大家明白我對獎項真係非常不主動,但畀到我又唔抗拒,以後有人約我唔再係出街,而係視帝起駕。(咁真係會起「價」?)我打自己工啫,最多咪加人工。」說到不負責,子華稱除非是真話,否則依舊會繼續不負責任的開玩笑,不過其實今次得獎他認為是多年累積的,感謝各不眠不休的同事!

情同「表親」
提到有指網民抨擊Chilam、靚靚因失落「視帝」而不服氣,子華力撐一點都不覺,並自揭跟靚靚的淵源:「好多年前我同靚靚合作拍電影《情人知己》,之後一直以表哥、表妹相稱,我睇住佢同Chilam拍拖、生仔,就好似表妹、表妹夫,我當佢哋係我親戚一樣,我係唔會講任何引起誤會嘅說話。(靚靚有冇打畀你講恭喜?)佢冇我電話,通常喺街撞到,但我撞到佢哋真係非常高興,呢方面(指Chilam的事)我一個字都唔會講,唔想影響我哋親戚關係。」

當晚從嘟嘟口中得知獲獎,會否更意義重大?子華重提當年曾有某藝術家頒獎禮欲頒獎給他,條件是要出席和表演,最後他沒出席也沒有獎,覺得如今無綫不出席也有獎項,是超越整個無綫向前行:「本來我冇咁快公布,但為咗畀大家知我來年動向,我宣布明年年底我會開棟篤笑,所以真係冇時間,我仲會客串多部戲,做『串帝』。」今天他會自掏腰包慶功宴及一起看大結局。另外,子善與君馨在台上談起與子華拍攝時的點滴,感動落淚,事後君馨也大讚子華是個很好的前輩。

1220-00282-001b1

子華視帝獎座在手,感謝徐子珊提醒要盛裝出席,不能穿波衫波褲。

1220-00282-001b3

一眾藝員同賀出爐視帝黃子華

1220-00282-001b4

子華感謝各位藝員好友力撐。