猶記得陳靜（DaDa）在金像獎頒獎禮台上要「多謝高登先！」雖然是錯有錯着，但足見高登友威力。第二屆「高登男神選舉」前晚開始投票，今屆入圍名單非常強勁，分別有謝霆鋒、黃子華、張國榮等。當中最特別的有三位，包括與魯芬BB同等分量的林雪、早前公開承認同性戀的何韻詩，還有由四方面變V煞面的胡鴻鈞，由於他「後天發育」得太不尋常，經常被網民改圖，並指他「削骨還父」，未知是否「孝感動天」事迹被推上榜。至昨晚7時，暫以黃子華領先，張國榮和胡鴻鈞僅次其後，何韻詩成績亦算中上，與吳彥祖和周潤發叮噹碼頭，投票至下月8日為止。

「有份嘅人都騎呢」
上屆得第三名的黃子華昨日在奧海城出席「惜食堂」活動，對成為候選男神，子華說：「呢件事我唔主動、唔抗拒、唔負責。」對於霆鋒是候選人之一，子華笑說：「因為我有份，成日覺得有份嘅人都係騎呢啲，原來霆鋒都有俾高登仔留意，咁我就認真感謝自己成為大熱，拉吓霆鋒車邊先。」而何韻詩也入圍男神，他感驚訝地說：「呢樣亦係高登好處，每個人都有機會。」上屆有陰謀地拍片拉票的鄭子誠今年未能入圍，問子華有甚麼對策？他說：「上到去係咪我都冇人知啦，唔通拍條片呀？我都話唔負責，唔主動咯。可能某人得獎係因為佢睇過AV，而我得獎係因為食咗乾炒牛河，都唔知乜原因受歡迎，亦唔知乜準則，每年都有啲唔知乜草莓獎，究竟係咪好嘢嚟㗎，畀隻草莓你嘆，總之大家開心就得。」而他將於年尾在紅館開騷，但場數及主題暫未可公佈。

黃子華昨自認騎呢，得知謝霆鋒有份入圍亦感驚訝。