黃子華同佘詩曼曾合作過拍劇，昨日兩人出席活動時，透露稍後將會再次合作拍新片，問黃子華有冇咀戲，佢就話要睇女主角肯做乜，而佘詩曼就踢爆當年拍劇時經常被男方整蠱，搞到自己忍唔住成個牙籤筒車埋對方度㖭！

黃子華、佘詩曼與古天樂等，昨日出席中環hmv概念店剪綵儀式，曾經合作過拍劇集《絕代商驕》的子華與阿佘，稍後會合作拍攝動作搞笑片，問到子華會否跟阿佘談情說愛？他坦言：「呢啲避免唔到嘅。（咀戲呢？）男演員喺呢方面好被動，要睇女主角肯做啲乜。」記者笑稱牀上戲都算是「動作片」之一，子華即笑笑口說：「你想多咗喇！呢一部係特務電影。」

至於女主角阿佘被問會否擔心因子華爆肚而招架不住？阿佘大爆當年拍劇經常被對方整蠱：「我口才唔得，還唔到口，咪還手囉！試過忍唔住成個牙籤筒車埋去，之後我郁少少手，佢都會即刻縮囉！」

黃子華與佘詩曼再度合作，默契十足。

（左起）連詩雅、雨僑、古天樂、蕭定一、佘詩曼與黃子華一起出席開幕禮。