蔡少芬拍外景遇內地旅行團fans顯熱情

2003年12月29日 | 東方日報

蔡少芬(Ada)與黃子華昨日為無綫劇集《棟篤神探》於九龍灣一商業大廈內拍外景,但由於該處有很多內地旅行團上樓購物,加上Ada在內地拍過不少劇集,頗有知名度,令到很多同胞圍攏起來,熱情的要她簽名,更拉着她硬要一起合照,令拍攝進度受阻,不過,這個情況並無發生在子華身上,冇人理的子華只有木口木面地吹口琴打發時間,顯得有點無奈兼無癮。

拍攝曾受阻酸溜溜
對於拍攝受阻,子華開玩笑說:「拍外景係咁上下,蔡少芬咁紅咁多fans,咁就離間咗我哋嘅感情,我唔想再同佢合作,尤其是外景,見佢係女人咋,係男人我就扯佢頭髮,我仲羨慕佢有個fans好靚女,仲靚過蔡少芬,真係唔明點解仲要問佢攞簽名,(你喺內地有冇劇集播過?)《溥儀》囉,邊個會認得我呀,我阿媽都唔認得啦,因為我一年靚過一年嘛。」語氣酸溜溜。

暗笑子華係「乜水」
而曾經一度被內地遊客追住合照的Ada,的確被嚇親:「有嚇親㗎,因為有人飛擒大抱,不過冇乜嘢嘅,我喺內地登台都係咁,受歡迎嘅感覺係開心嘅,好過人哋行過都唔知你係『乜水』呀。」咦,子華豈不就是那個「乜水」?

另外,聖誕期間Ada日日開工,只趁廿六日早收工與朋友們聚會交換禮物,當記者接連追問她送了甚麼禮物給男友或男友送甚麼給她時,她都只是笑着繼續說如何與朋友開心度過,輕輕避過有關男友的任何問題。