豁出去!子華畀阿佘高踭鞋踩「小子華」

2017年4月30日 | on.cc 東網

藝人黃子華及佘詩曼(阿佘)今晚到中環出席電影《棟篤特工》煞科宴,子華表示由開鏡到拍完,眨吓眼已兩個月。問到今次是否碌盡人情牌,找來很多好友客串?他說:「今次趁呢個機會要多謝大家,唔係無言感激,係要大聲感言,呢套戲原本只係需要兩位飾演巨星,開頭搵咗兩個啦!最後係嚟多咗十倍,所以要藉呢個機會好感謝呢班好朋友,我個人特別感謝,係感覺到大家想拯救我唔使再做票房毒藥,係完全出於愛心,領養寵物咁撐嘅,我今日唔能夠逐個多謝,因為實講漏,就一次過講多謝各位!(咁咪超支?)更多謝有人連利是都唔收,仲請埋嘢食咁走咗去,『有言感激』!(介意人話你係票房毒藥?)我係唔介意,我係好現實嘅人,呢樣嘢我係幾舒服㗎!但當然嚟緊就唔好喇!咁多朋友幫咗手,我哋落咗好多苦功,老闆又大膽,阿佘形象又破格晒啦!」

搣甩票房毒藥污名
語畢阿佘即冷笑了幾笑,子華說:「你睇吓佢啲戲都未甩,個衰樣都未甩!」阿佘表示戲中有多個特別造型:「去到結尾個造型,子華係覺得最正嘅,覺得我成個戲應該都係咁!子華說:「唔係醜,但大家冇見過阿佘咁嘅演繹。」阿佘說:「真係第一次。(因為要幫子華搣甩污名?)其實幾可愛㗎!我哋諗咗好耐。」子華說:「係我哋幫佢搣甩本身個形象,其實阿佘有好高嘅塑造性!」

預咗被虐待
對於「巨胸翠如」鄧月平表示有場戲要搏命除子華褲頭皮帶,子華笑說:「因為呢樣嘢我知佢係好投入嘅演員,條皮帶我自己都除唔到,個宅男造型條皮帶係好難除嘅。(有冇尷尬?)我已經過咗呢個階段好耐。」阿佘笑言子華已豁出去,其中一場戲她要穿高踭鞋狂踩「小子華」,子華說:「拍得007呢類戲預咗被虐待,身體都係身外物,當然有做好安全工夫。」

對於有網友提議由一些藝人加入政府部門,子華笑言對文化局較有興趣:「但暫時好似未有呢個部門喎!(點睇有傳陳美齡將做教育局局長?)呢啲嘢我識條紅衫咩?我點知教育局局長要做啲咩,陳美齡又係咩境況,唔深入研究點可以亂嚟。」

bkn-20170430201243403-0430_00862_001_01b

子華同阿佘又一次合作啦!

bkn-20170430201243403-0430_00862_001_02b

子華為搣甩票房毒藥污名豁出去。

bkn-20170430201243403-0430_00862_001_03b

阿佘話佢有場戲要着高踭鞋狂踩「小子華」。

bkn-20170430201243403-0430_00862_001_04b

諗到都痛呀!

bkn-20170430201243403-0430_00862_001_07b

bkn-20170430201243403-0430_00862_001_09b