黃子華專心籌拍喜劇

2001年2月24日 | 東方日報

自從《男親女愛》舞台劇之後,養尊處優了一排的黃子華又有新搞作,早前夥拍苑瓊丹及谷德昭為迪士尼復活節新片《騎呢大帝》作配音演出。子華昨日出席記者會時,透露現時正密鑼緊鼓,籌備自己的影壇代表作,希望五、六月可以開工拍攝,預算投資一千萬左右。

子華會否找嘟嘟或者女友參與新片的演出?他說:「要視乎角色,同埋都要問老闆意見。今年可以話係使錢嘅一年,為咗專心搞呢部戲我已經推咗四、五套電影,希望可以拍出一部真正好笑嘅喜劇。(係咪想威脅星爺?)唔係,我同星爺係兩種唔同嘅喜劇演員,我個人就十分喜愛星爺嘅喜劇。(你點睇星爺俾人話江郎才盡?)我十幾年前就已經江郎才盡添啦,不過都要做。希望套戲搞得成,跟住就乜都得,事業上已經冇遺憾。(到時係咪會結婚?)視乎各方面嘅反應啦!或者繼續江郎才盡囉!」