早前被踢爆與圈外女友共築愛巢的出爐視帝黃子華，前晚與視后田蕊妮到荃灣風騷亮相無綫迎春節目。二人整古作怪擺Chok爆甫士拍照。明顯增磅的子華顯得容光煥發，提到馬年大計除棟篤笑外，還打算繼續增肥：「呢個新年可以放肆咁食糕，之前啲人話我瘦，今年咪試吓盡量增肥，起碼二三十磅，增到有抗議聲音先停。（拍拖甜到漏所以增咗磅？）日日都Sweet啦！」

罕有以鬍鬚造型登場的子華，笑言被媽咪罵：「佢話睇唔慣囉！佢仲當我六歲細路仔。」新年假期會陪媽咪外，更準備到女友家拜年。如果親友催婚，他笑言已有準備：「咪搵啲利是塞住佢把口囉！」

罕有留鬚的黃子華與田蕊妮出席活動時，分外風騷。