黃子華、港姐冠軍陳曉華、港姐季軍丁子田同友誼小姐陳靜堯今日喺九龍塘出席「高錕慈善基金」活動，子華以愛心慈善大使身份喺台上將腦退化資訊帶給大家：「我已經退休，唔再講笑，我依家好嚴肅，我唔係支持高錕慈善活動咁簡單，因為我某啲屋企人，我懷疑呢啲初步嘅象徵，依家香港人口老化，有好多老人家，都開始有腦退化嘅象徵，所以大家可以用『例牌乜嘢凍唔熱，唔想唔計唔開心』嚟估計，情緒都係一個先兆。」

受訪時，子華指家中有好多長者，從統計中，75歲以上總有一個有腦退化，其實係有得做測試。講到近排工作方面，子華透露正度緊2019年及2020年嘅project：「我走唔出呢行，我唔會突然間係上市公司主席。」係咪閉關度嘢？子華話：「依家退休，唔使閉關。」係咪棟篤笑？子華表示：「唔係棟篤笑，棟篤笑已經完結，係棟篤笑以外嘅嘢。（以後唔講笑？）我做高級幽默，做大家開心嘅事。（會唔會同農夫合作？）睇佢哋考唔考慮我，我唔想拖累佢哋事業，佢哋如日方中。」

黃子華今日出席「高錕慈善基金」活動。

子華仲講到，已經離唔開呢一行，所以新project會係棟篤笑以外嘅嘢。