【黃子華論89】點解警方發87枚催淚彈?子華篤爆:「89」好敏感!

2014年10月12日 | 蘋果日報

黃子華噚晚於紅館棟篤笑中,繼續大談佔中。佢話:「個騷我籌備咗兩年,半年前寫好稿,佢上個禮拜就佔中。」又要求大家俾佢繼續講少少關於佔中,先講催淚彈(同梁振英講嘅催淚煙係同一樣嘢)。子華問大家,可知點解928當日警方只係放87枚催淚彈?(溫馨提示:今日梁特首喺大台直播新聞節目中講明放催淚煙呢個決定唔關佢事)問完,子華當然會解釋俾大家聽:「點解87就停呢?因為,你再發,就88;再整多支,就89㗎喇喎。89係一個好敏感嘅數字,冇人想記起89有催淚彈,同埋89又會令你記起689。唔好提醒佢,唔該。」

子華又提到:「如果我哋特首有啲公關技巧嘅話,市民係唔需要同警隊對抗㗎。人民同警隊點會唔係一家人呢?警隊係專業嘅,但係用催淚彈係唔專業。大家諗一諗,過去香港幾十年發咗幾多次催淚彈?平均廿年都冇一次,你廿年都冇煮一次餸,你敢認大廚?你廿年都冇煮一次餸,咁你肯定係業餘㗎喇,咁你上次落多咗鹽,係可以原諒㗎嘛?所以警隊佢哋發催淚彈,係一時多咗,因為佢哋係業餘㗎嘛!」

子華又話抗爭市民都係業餘:「你哋都係冇收到錢去㗎嘛?都係業餘㗎嘛?」

到底有冇人收錢抗爭?套用番噚晚揸貨櫃車欄住《蘋果》大樓嗰位司機叔叔話齋:「你都知咩嘢事啦!」

1413094646_c825